Ann Bokwakwarin 33 - Ubir

Jacob Esau Inefotai

¹ Jacob on iyeit inai Esau an orot 400 mat si nat ites, on mes fifirig ikusebis Leah, Rachel a bobo jever ruam amosi.

² Bobo jever ruam nanatus mat ainau iyeinis sitawar weie Leah nanatun mat osi gibusi sitawar ato Rachel Joseph rus on gibui bag sitawar.

³ Ato Jacob toun on ainau an dam warar nasi itawar inai. Namon on ra nimtereban ruam nanaba uson itur ikwafir isur magin motob iruyein mom inai tuan orot aurin igat.

⁴ Baise Esau iyayai Jacob inefotai ato iman anjonai ireben bonai irous iboyayanin ato rus sibotouousis.

⁵ Namon Esau iyeit jever a fifirig ites ato itetem, “Atonio sabu on iyabon om mat wonat?” Jacob iyafotai iyau, “Osi on yau nanatu God an kaber emon yau am agirotiu iteu.”

⁶ Namon bobo jever ruam nanatus mat sinat Esau nanai sindas siruouen usos situr sikwafirai.

⁷ Namon Leah nanatun mat sinat sindas sirouen usos situr sikwafirai ato gibui bag on Rachel natun Joseph rus sinat sindas sirouen usos situr sikwafirai.

⁸ Esau on Jacob itetemai iyau, “Ato bobaitu mat ainau abinofoten on an yabin aifan?” Jacob iyafotai iyau, “Au bada nan on om am ya obin aurin.”

⁹ Baise Esau iyau, “Yau taiu, yau au bobaitu on sigaraba, aifan noam on ebotan.”

¹⁰ Jacob iyau, “Ambin, om am ya obin inidura bag mes on au siwar eibasitai ato ebo. Om magim aitai on God magin aitai ba, on emon om ari uboeu tiwag.

¹¹ Karun, abifefeyanim, fofonin atonio siwar om aurim aboen anat on eibasitai eboen; God on yau ikabereu aifan au gogoi on engon iteu.” Jacob nana idodoai ato Esau ibasitai iboen.

¹² Namon Esau iyau, “Ot tanbotitiwag ato tanmisir tanan, yau arimon aninau anan.”

¹³ Baise Jacob iyawur iyau, “Au bada, om usagob fifirig on usis sisam a yau on sheep a bobaitu fani nanatus mat abinonotis. Men fofonin ari ra kaitamom baiyagiginai nan tanan on, arimon bobaitu engon sinarab.

¹⁴ Karun, abifefeyanim, om einau enai, ato yau arimon sunub sunub anigibubunuem annat, fofoninai anabib bobaitu a fifirig mat weie arimon Edom nan taninefoten.”

¹⁵ Esau iyau, “Basit au orot fani on om bisimui anikirires.” Baise Jacob iyafotai iyau, “Au bada, aibo mes on nanaba ebiyamai, baise on on om am ya obin aurin.”

¹⁶ On mes on rai Esau ibosuruf imatabir men inai au Edom.

¹⁷ Baise Jacob on au Sukkoth inai nan an goa iyon, a bobaitu asi guwi mat iyonen. On mes efan min wabin iyor Sukkoth.

¹⁸ On kounai Jacob Mesopotamia emon imatabir on obinai inat Shechem mafam gagamin Canaan tafanamai igat, ato on an guwi on motob ato mafam gagamin bisinai, on nan iyon.

¹⁹ On Hamor wawan agirin Shechem taman emon on motob turin agim silver orot wat nim, onai itobon.

²⁰ On nan sirifu agim kema iyon ato iwabai El Elohe Israel asi God.