Ann Bokwakwarin 32 - Ubir

Jacob Ibotitiwag Esau Itnefotai Mes

¹ Jacob an dam warar mat asi etai sibib sinan men ato God an anea fani sinat sinefotai.

² On an werai Jacob on anea ites mom on iyau, “Nin on God an guwi efan,” on mes on efan iwabai Mahanaim.

³ Jacob dura bo bibotis ainau iyafares sinai Edom tafanamai tuan Esau aurin.

⁴ On iyaubaiyates iyau, “Omi atoio dura nanaba au bada Esau wonawur: ‘Am agirotin Jacob iyau,’ ‘Yau Laban rui weromin maiau wama inat ari weie amatabir men anat.

⁵ Yau on er au cow, donkey, sheep, goat a au agir jever a agir orot. Au bada, yau dura aurim abiyafar, onai om yau auriu on am ya obin utboai.”

⁶ On an werai dura bo bibotis sinat Jacob aurin ato siyawur siyau, “Wei wanai tuam Esau aurin ato ari bag on igat enat nono om innefotim mes. On an orot on 400 iboes mat senat.”

⁷ Jacob atonio dura itatam on iber kwakwan an not engon ifeu. On an sabu mat simama on ikusebis kuayo matas ruam simatar. On an sheep, goat, cow a camel on eb nanaba ikusebis ruam simatar.

⁸ On atonio nanaba inonot, “Esau innat kuayo matan ainauin auris inbiragit on, kuayo matan bairuin on sinayai sinan.”

⁹ Namon Jacob ibayoi iyau, “O yau wawau Abraham an God, a tamau Isaac an God. O BADA Om yau untatamiu, Om uyawureu uyau, ‘Yau anmatabir men au tafanamai a au dam warar auris ato Om uyau mataniu arimon bobo obis uniyamen auriu.

¹⁰ Yau on agirotiu a yau men orot obiu, baise om am kaber a am moa obin auriu ebiyamai. Ainau bag yau Jordan sareu arabon on men aifan tani abo auman arabon on ab au tutuk wat on abo arabon ato ari amamatabir on au kuayo matas ruam mat a nat.

¹¹ Yau aurim ababayoi tuau Esau iman emon uniyawasiu. Yau abeber, yabin on enat on yau a jever fifi mat engon iniragitei.’

¹² Baise om uyawureu uyau, ‘Om arimon unkaifareu tiwag a arimon uniyamai wawau agiriu sinison tore an gasa ba ato men fofonin siniyab.’”

¹³ Jacob fom kaitamom nan iyen gibunai on an bobaitu sanasi on tuan Esau an siwar irubinen.

¹⁴ goat toub on 200, goat tona on orot kaitamom, sheep toub on 200, sheep tona on orot kaitamom.

¹⁵ Camel toub nanatus auman on orot kaitamom, orot ta aurin auyotoat, cow toub on orot ruam, cow tona on auyotoat, donkey toub on orot kaitamom a donkey tona on auyotoat.

¹⁶ On an bobo sabu on bobaitu matas ta ta nan iyeinis sinkaifaren, ato an bobo sabu iyawures iyau, “Yau aunau wotawar ato wonitai bobaitu matas ta ta basusi on sanas sinen.”

¹⁷ On an bobo orot ainau intatawar on iyaubaiyatai iyau, “On an werai tuau Esau innefotem ato initetemim inau, ‘Om am bada iyafan? Om aumen enan? Atonio bobaitu engon namui on iyafan ebinoanai?’

¹⁸ Om uniyafotai unau, ‘Om am bobo orot Jacob noan. Osi on siwar an bada Esau aurin ebiyafar. Jacob toun on gibui bag enat.’”

¹⁹ Jacob on dura kaitamom min iyabonai bobaitu kaifarotis bairuin, baitonin a matas ta ta engon iyawures: “On an werai Esau wonnefotai, omi on dura kaitamom on nanaba wonawur.’

²⁰ Omi wonsagob wonau, ‘Aee, am bobo orot Jacob on gibui enat,’” Jacob inonot, “Siwar ato ainau ai yafar enan onai arimon nunuan anboai, weie on an werai magin anitai on abitutum on arimon ininotbureu.

²¹ Jacob an siwar on engon iyafaren sinai, ato on ekesin on fom an guwi ai iyen.

Jacob Peniel Nan Orot Tani Rus Siyen Sifirur

²² On fom kaitamom Jacob imisir awawan ruam, bobo jever ruam a nanatun auyotoat an yayatan kaitamom iboes ato Jabbok sareu menan tefa on nan sirabon.

²³ On iyafares sirabon gibunai on an sawar engon mat iyafaren sirabon.

²⁴ Ato Jacob on ekesin nan sikirir. Namon orot tani inat iforousai rus siyen sififirur mom inai ra iyabaseb.

²⁵ On an werai orot it on men fofonin Jacob itbomerubai on mes On Jacob gesagesanai irab ikuseren.

²⁶ Namon orot iyau, “Ra etotom, om eikirireu Yau anai.” Jacob iyafotai iyau, “Om baimomogin unitai weie yau anikirirem unan.”

²⁷ Orot Jacob itetemai iyau, “Om wabim mamaba?” On iyafotai iyau, “Yau wabiu Jacob.”

²⁸ Namon orot iyau, “Om wabim on men arimon sinyorem Jacob baise sinyorem Israel, yabin om God rum a orot fani mat woiyerarat ato tefasi ukayam.”

²⁹ Jacob iyau, “Karun, abifefeyanim, om wabim ekasoneu.” Baise on iyafotai iyau, “Om aibo mes egogoi wabiu unsagob?” Namon on Jacob imomoginai.

³⁰ On mes Jacob on efan wabin iyor Peniel, on an yabin min yau God rui magi wairuruai ato yau nana yawasiu amama.

³¹ Jacob Peniel ibikirir auman auman wera igai, ato ibisait auman, yabin on an fui ikuseiren.

³² On fasinai inat ari Israel yangan foro touyan an fui matan karukar on men sam on, yabin Jacob min on rarikai nan sirab.