Ann Bokwakwarin 3 - Ubir

Adam A Eve Rus God Fonan Siseir

¹ BADA God on rega an bobaitu engon ifofouris sanasi, mota on kutatabir ansagobotin bag men bobaitu fani ba. Mota on jever aurin iyau, “Omi min dura bag, God iyawurem atonio masau amonai on men wengar uwan tani wonan i?”

² Jever on mota iyawur iyau, “Wei on masau amonai wengar uwas on engon wanam.

³ Baise God on iyau, ‘Omi wengar ato masau basunai bag etatawar on uwan men wonan a men wonruyein mes, ato omi on wonbiyamai on arimon wonarab.’”

⁴ Baise mota on jever iyawur iyau, “Omi dura bag arimon men wonarab on.

⁵ Yabin God isagob omi wengar uwan wonboai wonanin on arimon matam sinruserenis wonnat God ba wonmatar, ato arimon wonsagob menan on obin a menan on komasin.”

⁶ Namon jever wengar uwan it on bayu obin ato wakiroron isoror, mat inonot on igogoi bag gigiboan itboai, on mes jever wengar uwan tani ibo iyan. On awan orot bisinai imama on turin itai iyan.

⁷ Namon osi rus matas on siruserenis, ato tous sisagobis on keremomotis. On mes osi bubudau rorous sisagiren ato beber mes siyafofotes.

⁸ On rabirabi wera saminai orot awan rus on BADA God masauai ibibib on rarabin sitatam, on mes osi rus sinai wengar sanasi siyob.

⁹ Baise BADA God on orot aurin iyor iyau, “Adam, om menan?”

¹⁰ Orot iyafotai iyau, “Yau atatamim Om masauai ubib unat on mes aber auob, yabin yau on keremomotiu.”

¹¹ Ato God iyau, “Iyafan ikasonem om keremomotim? Om wengar uwan ato dura wawaninai asofafarim men utan on ubo uyan bait?”

¹² Orot iyafotai iyau, “Jever ato om ubiteu on wengar uwan turin iteu aan.”

¹³ Namon BADA God on jever aurin iyau, “Atonio bobo on aifan uyamai?” Ato jever iyafotai iyau, “Mota min on ikuyoyowiu ato abo aan.”

¹⁴ On mes BADA God mota aurin iyau, “Om atonio bobo uyamai on mes, om on gogabur asi bobaitu a rega asi bobaitu engon tefasi on om audabim! Om arimon yamui undudun ato arimon fofou unam am yawas tutufinai.

¹⁵ Ato Yau arimon aniyamai om a jever rum on sanamui on wonbimagigiren bonen a om am fesi a jever an fesi mat on sinbiragit bonen. Ato osi tani on arimon unim infasfinim ato om on arimon ann etun ungiai.”

¹⁶ Namon God on jever aurin iyau, “Om unbinafot nan on arimon usibaban gagamin anitem, om arimon usibaban auman fifirig unitu. Baise om on arimon nana awam orot ungogoiai bisinai wat. Ato om arimon on an faiwar babanai unama.”

¹⁷ Ato God on Adam aurin iyau, “Om dura wawaninai asofafarim wengar uwan men utan, ato om awam fonan utatam ubo uyan on mes, Yau motob on audabai. Om arimon am yawas tutufinai bobo gagamin bag unabo weie bayu inmatar unan

¹⁸ Gwagwar a wayo aisikis on arimon sinkubouis sinag am masau sintoutanis, om arimon wengar a wayo rorous motob emon segeg on unam.

¹⁹ Om arimon bobo wawanin unabo abar untakakair unreben weie bayu inmatar. Om wantoan nana bobo wawanin unbobo mom asir unarab ato au motob unmatabir men unsur, yabin Yau on motob emon afourim. Yau on fofou emon afourim on mes om unmatabir men au fofou.”

²⁰ Adam awan iwabai Eve, on an yabin min sabu yawasis semama, osi ayos.

²¹ BADA God bobaitu korofis on iyamen beber mes, ato Adam awan rus iyotes.

²² Ato BADA God iyau, “Orot ari inat ot ba imatar, on sawar engon tutufin obin a komasin on isagob. On men tanibasitai iman inotet ingat wengar yayawasin ba uwan inboai inan, ato yawasin wantoan inama.”

²³ On mes BADA God orot ifaitan Eden masau emon igat, efan menan God orot ifourai nan masau ittar itab mes.

²⁴ BADA God on orot a jever ifaitanis sigat gibunai, on anea wawanin a seri wairaf wamemeran auman aunan augibun ebitabubu on Eden Masau au wera matan na iya eta itkakaifarai onai sabu men yawas an wengar aurin sitar mes.