Ann Bokwakwarin 27 - Ubir

Isaac On Jacob Imomoginai

¹ Isaac ari on iorokwar ato matan sifot. On natun orot abou iyor inat ato iyawur iyau, “Yau natu!” Esau iyafotai iyau, “Men bab, yau nio.”

² Isaac iyau, “Yau on aiorokwar ato men asagob meyan arimon anarab.

³ Om am fidu an iyo mat eboen ato egat enai regai masono tani unyoai ato unboai unnat weineu.

⁴ Yau au gogoi bayu momonin on nanaba eitab ato ebo enat auriu. Yau on bayu anam insawar gibunai arimon au baimomogin kanfoun anitem weie anarab.”

⁵ On an rai Isaac on Esau aurin dura ibikakafun on Rebecca itatam. On mes on an werai Esau igat inai regai bib mes,

⁶ Rebecca natun Jacob iyawur iyau, “Yau ato arimon atatam tamam on Esau iyawur iyau,

⁷ ‘Om masono tani ebo enat ato eitab weineu. Yau anam insawar gibunai ato yau arimon BADA matanai au baimomogin anitem weie anarab.’”

⁸ Rebecca an dura ibotein iyau, “Ari weie natu, om fonau etatam ato aifan anau on nanaba uniyamai.

⁹ Om enai goat unis sigaraba setatawar amosi on goat bobous momos ruam eboen enat anitaben ato on emon tamam an gogoi bayu momonin anbotitiwag.

¹⁰ Om unboai unan tamam unitai inam ato arimon an baimomogin initem weie inarab.”

¹¹ Baise Jacob ayon iyawur iyau, “Om usagob Esau on bubunin youbin ato yau on usiu rumomoyin.

¹² Tamau usiu inbototobon mes on ingatureu yau abisigoai on, arimon yau tou an audabiu ato arimon men baimomogin anboai on.”

¹³ Fifi ayon iyafotai iyau, “Yau natu, aifan audab on eikirir yau anboai, yau dura aifan au on bobo nanaba eiyamai, om enai goat ruam eboen enat auriu.”

¹⁴ On mes on inai ato goat ruam on iboen inat ayon itai, ato Rebecca bayu momonis itaben ibotitiwagen mamaba Isaac an gogoi iyau nanaba.

¹⁵ Namon Rebecca on Esau usin an baitakwakwaren obis bag goai iya siyen on iboen Jacob itakwakwarai.

¹⁶ Rebecca goat korofis iboen Jacob imanai a anyonai menan usin rumomois on nan ibo babaren.

¹⁷ Namon on bayu momonis a rafi sarar teteren mat on natun Jacob itai.

¹⁸ Namon Jacob inai taman aurin ato iyau, “Bab.” Isaac iyafotai iyau, “Men, yau natu, om iyafan.”

¹⁹ Jacob iyafotai iyau, “Yau on natum ainau orot Esau. Om dura mamaba uyawureu on aiyamai. Karun, emisir emair ato bayu momonis abotitiwag abo anat on unam weie ato am baimomogin uniteu.”

²⁰ Isaac itetemai iyau, “Yau natu, om mamaba gariwat bag ugaturai? Jacob iyafotai iyau, “BADA am God ibaisiu agaturai.”

²¹ Isaac on Jacob iyawur iyau, “Om auriu auriu enat usim anbotobon ansagob. Om on dura bag Esau ai ambin?”

²² Jacob irui taman Isaac bisinai bag ato Isaac on natun usin ibotobon ato iyau, “Om fonam on Jacob fonan, baise imam abotobon on Esau iman.”

²³ Isaac men irubunagai on Jacob, baise on iman on er bubunin tuan Esau iman ba. Isaac on an baimomogin ititai mes,

²⁴ baise itetemai men iyau, “Om min dura bag yau natu Esau i?” Jacob iyafotai iyau, “Dura bag, yau on Esau.”

²⁵ Isaac iyau, “Yau natu, au gogoi bayu momonis ubotitiwag on ebo enat anam, on gibunai weie au yau baimomogin anitem.” Jacob bayu iboen inat ato itai iyam a sareu wine mat ibo inat itai itoman.

²⁶ Namon on taman Isaac iyau, “Yau natu, om auriu auriu enat ato eyaniu.”

²⁷ On mes on inat bisinai ato iyaan. On an werai Isaac on Esau an baitakwakwaren yanden itatam on imomoginai ato iyau, “Aee, yau natu yanden on motob ato BADA imomoginai on yanden ba.

²⁸ Yau God abifefeyanai on safam an turub initem a tafanam an mour ungaturai. On sawareg a sareu wine bobous gagaminai initem.

²⁹ Mat On iniyamai arimon sabu tafanam engon tutufinai on om siniagirem a sabu engon tutufin arimon om sinkakafem. Om arimon taitaim tutuam engon uninetewaris, a ayom nanatun wawan agirin arimon om sinkakafem. Osi sabu iyabon saudabim on God arimon inaudabis a osi sabu iyabon sebimomoginem on God arimon arimon inimomomgines.

Esau Ifefeyan Isaac Itimomoginai Mes

³⁰ Isaac on Jacob imomoginai isawar ato Jacob on sasasan wat taman ikirir inai mom on, tuan Esau ba regai ibibib on imatabir inat igat.

³¹ On mat bayu momonis itaben ato iboen inai taman aurin. Ato iyau, “Karun tamau, om emisir emair bayu momonis ato aurim abotitiwag abo anat on unam weie am baimomogin uniteu.”

³² Isaac itetemai iyau, “Om iyafan?” Esau iyafotai iyau, “Yau om natum ainau orot, Esau.”

³³ Isaac on men sunub iror ato ibosuruf usin engon sibiror ato iyau, “Ato nan on iyafan bobaitu iyasubun ibo inat auriu i? Yau ato arimon aam isawar mom ato om unat. Yau au baimomogin kanfoun on engon tutufin on aitai, ato dura bag arimon on ininoanai au wantoan.”

³⁴ On an werai Esau taman an dura itatam mom on, fonan gagaminai iyoku itou fufuan ato ifefeyan iyau, “Tamau, yau mat am baimomogin eiteu.”

³⁵ Isaac iyafotai iyau, “Om taim inat isigoweu. Ato om am baimomogin on, on ibo.

³⁶ Esau iyau, “Atonio on wera bairuin ba yau isigoweu. Men taniyoi on, on mes wabin min Jacob. Yau au abou an buder on, on ibo ato ari on au baimomogin ba ibo.” Namon Esau on taman itetemai iyau, “Om men buder tani ubotan yau auriu i?”

³⁷ Isaac iyafotai iyau, “Yau on aiyamai inat om am bada mes imatar a mat dam warar on sinnat on an bobo sabu mes simatar, a sawareg a sareu wine boboun gagaminai aitai. Yau natu, men aifan tani yen arimon aurim aniyamai.”

³⁸ Esau on nana taman idodoai ibifefeyanai i yau “Tamau om am baimomogin min on wat i? Yau mat eimomogineu.” On ibosuruf itou.

³⁹ Namon on taman Isaac iyafotai iyau, “Om am ma on tafanam an mour emon mabimui unama unibitanangi a safam an turub emon mat mabimui unama.

⁴⁰ Om arimon baiyo baigagamai nan bayu ungaturai unamair unama, ato taim uniagirai. Baise on an werai unbifonaseir on, om arimon on an an baibad emon on toum unkusebim mabimui unama.”

⁴¹ Esau tain Jacob aurin on gigit nana iyen yabin taman on Jacob imomoginai on mes. Esau inonot iyau, “Tamau an rabob an ra on inat iufin nono ato tou yababan insawar gibunai on yau Jacob anasubun.”

⁴² Baise on an werai Rebecca itatam Esau aifan iyau. On mes dura iyafar Jacob inat ato iyawur iyau, “Untatam, om tuam Esau on ebinonotai inasubunuem mes.

⁴³ On mes natu, yau dura aifan au on nanaba unafour. Om ari bag unan tafanam Haran nan robu Laban aurin.

⁴⁴ Ato om nan rum kafakakai wonama weie tuam an yatatab on insibu insur.

⁴⁵ On an rai om tuam an yatatab insawar a ato bobo aifan aurin ubiyamai on mat ininosfotai weie, yau dura aniyafar ato unmatabir men unnat. Yau men agogoi ra kaitamom amonai on nanatu ruam engon anisiwanim.”

Isaac Jacob Iyafarai Laban Aurin

⁴⁶ Namon Rebecca on Isaac iyawur iyau, “Yau Hitt jever mat ma on abi suweigan. Ato Jacob ba awan on tafanam emon inbiawan mes on, yau arimon men anama on.”