Ann Bokwakwarin 2 - Ubir

¹ On etai God safam a tafanam a sawar ta ta amonai sen on engon ifouren isawar.

² Ra nimtereban bairuinai God bobo engon tutufin ifofouren on i sawaren, on mes on ra nimtereban bairuin bobo engon tutufin emon on i yarir.

³ Ato God on ra nimtereban bairuin imomoginai ato iyamai ra kakafaiin imatar, yabin On bobo engon tutufin ifofouren on isawaren weie on emon i yarir.

Adam A Eve

⁴ Atonio on safam a tafanam mamaba imamatar on an dudur. On an werai BADA God safam a tafanam ifourai,

⁵ on nan on men wengar a wayo tani motobai ikubou igai mes, yabin BADA God on usan men iyamai tafanamai iyar a men orot tani nan imama on motobai ittar itab.

⁶ Baise sareu motob emon igai ato motob tefan engon inunubai.

⁷ BADA God on motob an fofou emon on orot ifourai, weie yawas an yabat on aburunai ibabain ato orot inat yawasin imatar.

⁸ Namon BADA God on Eden au wera matan emon nan masau ibofefes, ato orot ibimatarai on nan iyein.

⁹ BADA God on wengar magis magis a wengar uwas aam auris obis anbabaton on nan ifouren sikubobouis sigai. On masau basunai on yawas an wengar on nan itatawar. A wengar tani ato sagob initem menan on yawas obin a yawas komasin on mat nan itatawar.

¹⁰ Sareu masau ibinunubai on Eden emon isusur, on nan on ikuseb sareu matas bat simatar.

¹¹ Sareu ainauin wabin on Pishon, on Havilah tafanam amonai yai ebikibubuai, on nan on agim gold sen.

¹² On tafanam an agim gold on obin, wengar kerin yanden ninibin a agim an baiyan gagamin wabin onix on mat nan sen.

¹³ Sareu bairuin wabin on Gihon, on Cush tafanam amonai yai ebikibubuai,

¹⁴ Sareu baitonin wabin on Tigris, on Asshur au wera matan na yai.

¹⁵ BADA God on orot ibo Eden Masauai nan iyein masau ittar itab a itkaifarai mes.

¹⁶ Ato BADA God on orot dura wawaninai iyawur iyau, “Om on wengar uwas atonio masauai on engon unam;

¹⁷ baise om men wengar ato sagob initem menan on obin a komasin on uwan unan mes. Om on wengar uwan unanin on arimon totor wat unarab.”

¹⁸ BADA God iyau, “Men iyobin arimon orot ekesin mom inama inmasisibu. Yau arimon on orot an baibaisotin turan anfourai inibaisin.”

¹⁹ On mes BADA God on motob ibo ato on emon bobaitu tutuenis a tefan an kiwiu engon tutufin ifouren, ato iboen inat orot aurin iteit wabis itites mes. Ato orot mamaba bobaitu kakaita kakaita ibiwabis min on nanaba seyoyores.

²⁰ On mes orot on gogabur an bobaitu, tefan an kiwiu a motob an bobaitu tutuenis engon iwabis. Baise Adam an baibaisotin turan on men igaturai on.

²¹ On mes BADA God orot iyamai nousin ifot bag iyen bubur. Ato on nana iyen bubur ato God on orot sesebin rarik tani iboseir ato anefanin on korofin ibo iyafotai.

²² Namon BADA God on orot sesebin rarik emon jever ifourai ato ibo inat orot aurin.

²³ Ato orot iyau, “Ensairen! Ari weie nin on yau tou au rarik a yau tou au biou turin. On arimon aniwabai, ‘Jever,’ yabin God on yau au rarik emon imatarai.”

²⁴ On yabinai orot arimon ayon taman inikirires ato inan jever rus sinikaita ato osi rus arimon sinnat usin kaitamom sinmatar.

²⁵ Orot awan jever rus on keremomotis, baise osi men sibomamai on.