Ann Bokwakwarin 19 - Ubir

BADA Sodom A Gomorrah Ikomasai

¹ On an rai anea ruam on rabirabi sinat au Sodom ato Lot on mafam gagamin an furi awanai nan imair imama. On iyeit osi ites mom on, on imisir ato inai itnefotes mes. On nasi sindan irou ikwafir isur magin motob iruyein,

² ato iyau, “Kavian, yau on atonio, omi aurim anabo ato abifefeyanim, omi wonat au goai. Omi amm wonsouen ato fom mat nin tanen weie raso fomenei fomenei wonmisir ato ami etai wonabib wonan.” Baise osi siyafotai siyau, “Ambin, wei fom on arimon nin mafam gagamin an furi amonai efan farabai nan wanen.”

³ On nana idodois on mes mat sinai an goai. Lot an bobo orot ifores rafi sarar fani siteren a siu obis sibotitiwag nanawan sabu auris. Osi sibotitiwag isawar ato sites siyam.

⁴ Nanawan sabu ruam on sibotitiwagis sitar siten bubur mes ato Sodom mafam gagamin an orot engon tutufin, orot bobous a oroti engon sinat Lot an goa sireben fifin.

⁵ Osi Lot aurin siyor ato sitetemai iyau, “Ato orot sinat ari fom om mat en mes on menan? Om wei auri eboes egat.” Sodom orot sigogoi on osi mat sitiyayar mes.

⁶ Lot igat au koun ato metewan koun emon irufot.

⁷ On auris iyau, “Tuturau, abifefeyanim, omi men bobo komasin on nanaba woniyamai mes!

⁸ Woit, yau nanatu jeverig ruam, osi on matafis semama. Yau osi anboes angat omi aurim ato aifan wogogoi nanaba auris wonafour. Baise atonio orot auris on men aifan tani wonafour mes; osi on nanawanotis sinat au goa rufafarin amonai semama.”

⁹ Baise osi siyau, “Om on orot toumanim, wei ai eta erereb. Om iyafan on wei unawurei nanaba wanafour? Om men wai eta unrereb on, wei arimon komasin bag om aurim wanafour men osi orot ruam ba.” Ato osi Lot augib na sirukou ato sigai metewan sitaseb sitar mes.

¹⁰ Baise orot ruam goa amon emon on imas siyotet igat Lot sitein men irui ato metewan sirufot.

¹¹ Namon osi orot ruam on sabu engon tutufin ato kounai sitatawar on sirou matas siwouman, men fofonin metewan sititai on.

Lot Sodom Ikirir

¹² Orot ruam Lot siyawur siyau, “Om abaim tani wat nin emama; nanatum orot, nanatum jeverig, rarawam orot ai dam warar fani nin mafam gagaminai semama on unboes wongat,

¹³ yabin wei atonio efan wanikomasai. BADA atonio osi sabu asi dura komasis gagamis on itatam nono, ato wei iyafarei wanat Sodom wanikomasai mes.”

¹⁴ Namon Lot inai orot iyabon nanatun jeverig sitiawanis mes on iyawures iyau, “Omi gariwat atonio efan woikirir wogat; BADA efan inikomasai.” Baise osi sinos on ibikobo.

¹⁵ Ra iyabaseb nan ato anea sifourtobon Lot sitiyagiginai mes. Osi siyau, “Om awam a nanatum jeverig ruam eboes ato gariwat wogat. Omi on nanaba wonfofour on arimon men ami yawas wonisiwanen on, an rai BADA mafam gagamin inbikomasai nan.”

¹⁶ Baise Lot on inonot sisit on mes men gariwat iyayob on. On fasinai orot ruam on Lot a on awan a nanatun jeverig ruam imasi siboen ato sibonanawaiis mafam gagamin emon sigat. Yabin BADA on Lot an dam wara mat ikaberes.

¹⁷ Namon anea tani iyau, “Omi ami yawas wonnos woniyai! Men au gib won rutabir a men roubabanai wontawar mes. Omi au oyau woniyai onai omi men wonarab.”

¹⁸ Baise Lot iyafotes iyau, “Ambin! au kavian, abifefeyanim men woniyamai on nanaba eta weromin wanan mes.

¹⁹ Om on am moa obin yau auriu a ukabereu, mat Om yau uyawasiu. Baise yau men fofonin anayai anan oyauai angat on. Komasin arimon innat inboeu anarab.

²⁰ Ato om mafam kafakakai uit i? On on akwafui. Eiyameu nan aniyai anan, eit on asir mafam kafakakai wat ato yau arimon inrufafareu.”

²¹ Anea iyafotai iyau, “Engon basit wat, abibasitem. On mafam arimon men anikomasai.

²² Baise om gariwat uniyai, Yau men bobo aifan tani aniyamai ab om ainau unan on efanai ungat weie. Lot on mafam aurin iyor kafakakai, on mes on mafam wabin min seyoyorai Zoar.

BADA Sodom A Gomorrah Ikomasai

²³ Wera igegeg an rai on Lot inat Zoar igat.

²⁴ Ra kaita BADA agim forabis wairaf auman safam emon iyafarai usan ba iyar isur mafam gagamis Sodom a Gomorrah tefasi,

²⁵ ato roubabanai sabu simama engon tutufin a nan wengar a wayo sigegeg on engon ikomasen.

²⁶ Baise Lot awan on au gib irutabir men ato on ra kaita ikitabirai inat agim kamitin imatar nan itawar.

²⁷ On ra kaitamomai Abraham fomenei fomenei imisir sasasan wat inai efan menan ainau BADA nanai itatawar on nan.

²⁸ On iyeit isur Sodom a Gomorrah iten a roubaban tutufin engon on bakur it motob emon igeg. On bakur igegeg an itin on momo fofotar yaras bakur gugugurin egeg ba on igeg.

²⁹ God mafam gagamis ato roubabanai siyen on engon ikomasen menan Lot imama nan, baise On Abraham an baifefeyan on inonotai on mes Lot komasin itgagaturai emon on irufafarai ibo igat iyawas.

Moab Sabu A Ammon Sabu Asi Bosurufin

³⁰ Lot on Zoar nan ma on iber, on mes on a nanatun jeverig ruam mat sigai oyauai nan agim dogu amonai sima.

³¹ Ra kaitamom ainau jeverei on tain aurin iyau, “Ot tamat on ebiorokwar ato nin tafanamai on orot ambin iyafan arimon iniawanit fifirig tanitu, ato tafanamai sabu sefofour ba.

³² Om enat ot tamat taniyamai intoman inikokok, onai ot mat tanen ato on emon on ot fifirig tanitu.”

³³ On fom osi jeverig ruam on tamas sareu wine sitai itoman ato ainau jeverei on rus siyen. Baise tamas on itoman kwakwan ikokok on mes men isagob jeverei mamaba bisinai iyen imimisir on.

³⁴ Ra bairuinai ainau jeverei on tain giya jever iyawur iyau, “Yau fom tamat rui waien; ato ari fom on taniyamai intoman inikokok men ato om ba rum wonen. Namon ot tamat emon on arimon fifirig tanitu.”

³⁵ On mes on fom tamas sibo sitomanai kwakwan ikokok ato giya jeverei ba taman rus siyen. On bobo min on nanaba imatar men, tamas itoman kwakwan ikokok ato men isagob jeverei mamaba bisinai iyen imimisir on.

³⁶ Atonio on etaiai Lot nanatun jeverig ruam tous tamas emon on sinafot.

³⁷ Ainau jeverei fifi orot ituai, on iwabai Moab. On fifi wawan agirin min ari seyoyores Moab yangan.

³⁸ Giya jeverei on eb fifi orot ituai, on iwabai Ben-Ammi. On fifi wawan agirin min ari seyoyores Ammon yangan.