Ann Bokwakwarin 18 - Ubir

BADA Abraham IyauMatanai Natun Orot Inarat Aurin

¹ BADA on Abraham aurin irobotet menan Mamre wengar gagamis sitatawar nan. Abraham on aiyet nanaba an guwi metewan awanai nan imair imama, yabin wera ifoforab kwakwan on mes.

² Abraham matan iyeit inai orot ton nan sitatawar ites. On ites mom on ra kaita imisir iyayai igat inai itnefotes mes. On sindan irou ikwafir isur magin motob iruyein,

³ ato iyawures iyau, “Au kavian, abifefeyanim wotawar men wonikirireu wonan mes, yau on atonio, omi aurim anabo.

⁴ Omi nin wengar babanai wonbiyarir ato yau sareu anboai annat amm wonsouen.

⁵ Yau arimon ami bayu kafakai anbotitiwag onai omi faiwar wonboai weie ami etai wonabib wonan. Omi wonat yau au goai on mes yau omi aurim anabo.” Osi orot ton siyafotai siyau, “Basit, dura ato uyau on nanaba tanafour.”

⁶ Abraham sasasan wat imatabir men an guwi amonai irui ato Sarah aurin iyau, “Gariwat! Rafi obin ato baik amonai yen on ebo egamatabir sarar eteren.”

⁷ Namon Abraham iyayai inai an bobaitu sigaraba sitatawar on nan ato sanasi tona boboun momon on ibo ato an agirotin itai, on sasasan wat iyasubun itab.

⁸ Abraham rura momon turin, cow an sus a cow bios iboen ato orot ton nasi nan iya. Osi orot ton bayu siyam ato Abraham on wengar babanai nan bisisi itatawar.

⁹ Namon orot ton Abraham sitetemai siyau, “Om awam Sarah on menan?” Ato on iyafotes iyau, “Sarah on guwi amonai emama.”

¹⁰ Osi sanasi orot tani on iyau, “Ari ra inan roke nimtereban bat insawar gibunai, yau arimon anmatabir men ato om awam Sarah on arimon fifi orot inituai.” Sarah on ato orot dura ibikakafun on kounai bag guwi metewan awanai imair imama itatam.

¹¹ Abraham Sarah rus on siorokwar sijenekwar bag, ato Sarah on fifirig baitu an wera on isawarai.

¹² On mes Sarah on toun aurin iserer ato iyau, “Yau ari on ai jenekwar a atumususur, mat awau on eb iorokwar ato men fofonin rui wanen waniyasisir on.”

¹³ Namon BADA on Abraham itetemai iyau, “Aibo mes Sarah iserer ato iyau, ‘Yau on ai jenekwar bag ato men fofonin fifi anituai on?’

¹⁴ Atonio on men bobo aifan tani wawanin BADA aurin on. Yau awurem au, ari ra inan roke nimtereban bat insawar weie yau anmatabir men ato Sarah arimon fifi orot inituai.”

¹⁵ Ato Sarah on iber ato isosouf iyau, “Yau men aserer on.” Baise BADA iyafotai iyau, “Ambin, om dura bag userer.”

Abraham Sodom Aurin Wawaninai Ifefeyan

¹⁶ Namon orot ton simisir ato sinai efan menan Sodom mafam gagamin sitinateteai mes. Ato Abraham on osi mat sinai eta nenenai itikirires sitan mes.

¹⁷ Ato BADA on Toun aurin ikakafun iyau, “Yau atonio bobo anfofour on men Abraham anibuniai mes.

¹⁸ Abraham wawan agirin arimon sabu gagamis a faiwaris bag sinmatar. Ato on orot fasinai, Yau arimon sabu tutufin engon animomogines.

¹⁹ Yau on arubinai onai on nanatun, wawan agirin dura wawaninai inawures Yau auriu sinifonabo a bobo obis a totoris wat sinafour. Osi on bobo sinfofour on Yau arimon bobo tutufin engon aurin anafour mamaba aumatanai ba.”

²⁰ Namon BADA on Abraham aurin iyau, “Yau dura atatam Sodom a Gomorrah sabu on yawas ta ta komasis sigaraba sefofour ato asi bokomas on irat kwakwan.

²¹ On mes Yau an sur anan sabu anites ansagob dura aifan atatam on dura bag ai ambin.”

²² Namon orot ruam simisir sinai au Sodom, baise BADA on Abraham rus nan sima.

²³ Abraham on BADA aurin itawadudun ato itetemai iyau, “Om on dura bag arimon sabu obis a sabu komasis mat unikomasis?

²⁴ Ato sabu obis orot ruam, orot ta aurin auyotoat (50) nan mafam gagamin amonai sinmama on, Om arimon osi mat engon unikomasis? Om fofonin sabu orot ruam, orot ta aurin auyotoat utnosis ato utiyawasis?

²⁵ Dura bag men sabu obis on sabu komasis mat unirabobis on. On men yawas obin on. Om men nanaba uniyamai. Om bobo nanaba unfofour on sabu obis a sabu komasis mat engon baimaki sinboai. On men yawas obin on. Om tafanam tutufin engon an baigurubaban orot on mes bobo totorin wat unafour.”

²⁶ BADA iyafotai iyau, “Yau sabu obis orot ruam, orot ta aurin auyotoat Sodom mafam amonai angagatures on yau arimon osi fasisi on mafam gagamin tutufin an kaberai.”

²⁷ Abraham ikakafun men iyau, “BADA, yau on isar fofou wat baise yau on uniu ererekab aurim dura anikakafun men.

²⁸ Baise tait sabu obis on men orot ruam, orot ta aurin auyotoat on, arimon sabu orot ruam an yayatan nim wat. Ato sabu nim ambin min, Om arimon mafam gagamin unikomasai? BADA iyafotai iyau, “Yau sabu obis orot ruam an yayatan nim angagatures on, Yau arimon men mafam gagamin anikomasai on.”

²⁹ Abraham ikakafun men iyau, “Ato sabu arimon orot ruam wat nan sinmama on mamaba.” BADA iyafotai iyau, “Sabu obis orot ruam wat nan on, men arimon mafam gagamin anikomasai on.”

³⁰ Abraham iyau, “BADA abifefeyanim men auriu uniyatatab mes, baise yau anikakafun men. Ato sabu obis orot kaitamom, orot ta aurin auyotoat on arimon mamaba?” BADA iyau, “Yau sabu obis orot kaitamom, orot ta aurin auyotoat angagatures on, yau arimon men mafam gagamin anikomasai on.”

³¹ Abraham iyau, “BADA abifefeyanim yau uniu ererekab aurim nana anbikakafun on einotbureu. Ato sabu obis orot kaitamom wat ungagatures on arimon mamaba?” BADA iyau, “Yau sabu obis orot kaitamom wat angagatures on, arimon men mafam gagamin anikomasai on.”

³² Abraham iyau, “BADA abifefeyanim, auriu men uniyatatab mes. Yau agogoi dura kaitamom wat ba aurim anikakafun. Ato sabu auyotoat ungagatures on arimon mamaba?” BADA iyau, “Yau sabu obis auyotoat wat angagatures on, Yau arimon men mafam gagamin anikomasai on.”

³³ BADA on Abraham aurin ikakafun isawar ato inai. Ato Abraham on imatabir men inai an au go.