Ann Bokwakwarin 17 - Ubir

Askibubu On Dura Bo Baibasit An Matair

¹ On an werai Abram an kwanda on orot wat bat, orot ta aurin auyotoat an yayatan bat, BADA on Abram aurin irobotet ato iyawur iyau, “Yau on God Faiwariu bag. Om Yau auriu unifonabo a ra fufur am yawas totoris wat unafour.

² Yau arimon au dura bo baibasit rut taniyamai ato am dam warar on sigaraba anitem.”

³ Abram sindan irou ikwafir isur magin motob iruyein, ato God on iyawur iyau,

⁴ “Yau atonio dura bo baibasit om rut tabiyamai: Yau aumatanim, om on arimon sabu sigaraba wawas agiris unmatar.

⁵ Om wabim Abram yen on abikitabirai Abraham, yabin Yau afofourim unnat sabu sigaraba wawas agiris unmatar.

⁶ Yau arimon wawam agirim sigaraba anitem, ato am dam warar inison tafanam engon sinboai. Ato fani on arimon sinnat aiwab sinmatar.

⁷ Yau arimon aumatan om aurim a wawam agirim gibui sinrarat auris on anbokikin dura bo baibasit mes wantoan inen. Yau on arimon om am God a wawam agirim asi God.

⁸ Om ari ato Canaan tafanamai emama on sabu fani asi tafanam. Ato Yau arimon om a wawam agirim atonio tafanam tutufin engon anitem nan wonama au wantoan, ato Yau on arimon om wawam agirim asi God.”

⁹ God on Abraham aurin iyau, “Om a wawam agirim gibui serarat mat on wonifonabo au dura bo baibasit wonbokikin:

¹⁰ Om a wawam agirim on engon wonibasit ato orot engon sanamui on woniaskibubues.

^11-12 Ato ari ra on unbosuruf fifirig orot gugudis serarat ra nimtereban baitonin gibunai on engon woniaskibubues, on eb om am agirotis am goai sirarat a agirotis tafanam fani emon utotobonis on engon woniaskibubues. Onai iniyoboet om a Yau rut on basuti dura bo baibasit on yen.

¹³ Orot kakaita kakaita engon woniaskibubues. Atonio usis an matair nan baiyoboen iniyamai on Yau au dura bo baibasit om Yau rut basuti on wantoan inen.

¹⁴ Orot iyafan men woniaskibubuai on arimon men an sabu mat sinama mes. Yabin on orot min Yau au dura bo baibasit iyastob ato on mabinai bag inama.

¹⁵ Mat God on Abraham aurin iyau, “Om awam wabin Sarai on men gibui unyorai men Sarai. On ari on wabin Sarah.

¹⁶ Yau arimon Sarah animomoginai ato on dura bag natum fifi orot inituai weinem. Yau arimon animomoginai ato on innat sabu engon tutufin ayos inmatar. Ato arimon wawan agirin sanasi on fani on arimon aiwab sinmatar.

¹⁷ Abraham sindan irou ikwafir isur magin motob iruyein iserer ato toun aurin iyau, “Orot an kwanda orot wat nim min fofonin arimon fifi orot inarat i? Ato Sarah an kwanda orot wat bat, orot ta aurin auyotoat min fofonin arimon fifi inituai i?”

¹⁸ Abraham on God aurin iyau, “Abifefeyanim, fofonin aumatan yau auriu ubiyamai on Ishmael on buder on itboai i?

¹⁹ Baise God iyau, “Ambin bag! Om awam Sarah on arimon natun fifi orot inituai ato wabin unyorai Isaac. Yau au dura bo baibasit on fifi orot a wawan agirin auris aniyamai. On dura bo baibasit on arimon inen wantoan au wantoan.

²⁰ Om Ishmael aurin ubifefeyaniu on atatam nono. Yau arimon animomoginai a nanatun a wawan agirin sigaraba anitai. On arimon aiwabis auyotoat an yayatan ruam tamas inmatar a Yau arimon anfourai wawan agirin sinnat sabu faiwaris bag sinmatar.

²¹ Baise Yau arimon au dura bo baibasit on natum Isaac aurin anbokikin. On fifi orot min arimon Sarah inituai atonio wera nanaba inan kwanda tani.”

²² On an werai God on Abraham aurin dura ikakafun isawar ato On ikirir inai.

²³ On ra kaitamomai Abraham on God aurin ifonabo ato natun Ishmael a orot fani an goai simama on engon iaskibubues, on eb Abraham an agirotis on an goai sirarat a agirotis fani tafanam fani emon itotobonis, osi engon iaskibubues.

^24-25 Abraham an kwanda on orot wat bat, orot ta aurin auyotoat an yayatan nimtereban bat (99), ato on natun Ishmael an kwanda on auyotoat an yayatan ton, ato rus engon siaskibubues.

²⁶ Osi rus on ra kaitamomai nan siaskibubues.

²⁷ Abraham an agirotis mat engon siaskibubues.