Ann Bokwakwarin 12 - Ubir

God Abram Iyor

¹ BADA on Abram iyawur iyau, “Om am tafanam, taitaim tutuam, tamam an dam warar on eikirires ato egat enai tafanam anbiyoboem on nan ungat.

² Yau arimon aniyamai nanatum wawam agirim inison ato tafanam engon inbonu. Yau arimon animomoginem ato wabim aniyamai inarat, om fasimui on sabu engon arimon obin sinboai.

³ Yau arimon sabu iyabon om aurim obin sebiyamai on arimon obin auris aniyamai. Ato iyai iyafan in audabim on arimon angaramin an audabai, ato om fasimui on sabu engon tafanamai arimon obin sinboai.”

⁴ On mes Abram igat mamaba BADA iyawur nanaba, ato abun Lot on rus sinai. Abram an kwanda on orot ton, orot ta aurin auyotoat an yayatan nim, (75) on an werai Haran mafam ikirir igat.

⁵ Abram on awan Sarai, abun Lot, asi sawar engon a an agirotis ato Haran nan i boes on engon mat sigat sinai Canaan tafanamai sigat.

⁶ Abram on Canaan tafanamai ibib inat wengar gagamin wabin Moreh itatawar anfaratai, Shechem nan. On an werai Canaan sabu min on tafanamai simama.

⁷ BADA on Abram aurin irobotet ato iyawur iyau, “Atonio tafanam on arimon om wawam agirim anites.” On mes Abram on sirifu agim kema iyon BADA aurin ikutetai efan menan BADA aurin irorobotet nan.

⁸ Namon on Shechem emon inai Bethel oyau oyau tafanamai au wera matan na nan an guwi iyon. Bethel tafanam on au wera sifun na ato Ai tafanam on au wera matan na. On nan Abram sirifu agim kema tani ba iyon BADA aurin, ato nan kwafirai.

⁹ Namon Abram ibosuruf men inanawan i nan mom inai Negev tafanamai igat.

Abram Egypt Nan

¹⁰ On an werai Canaan tafanamai on gomar imatar, on mes Abram isur inai Egypt nan wera dibon wat itama yabin min afoi gagamin i raran.

¹¹ Osi sinat Egypt mafam aurin sibiufin ato Abram on awan Sarai aurin iyau, “Yau sagob om on jever momogim anbabaton.

¹² On an werai Egypt sabu om sinitem on arimon sinau, ‘Atonio jever on, on orot awan.’ Namon osi arimon yau sinasubunueu baise om on arimon sinikirirem unama.

¹³ On mes om unawures unau, yau on om robum, onai on yau arimon om fasimui on sinkaifareu tiwag yawasiu anama.”

¹⁴ On an werai Abram inat au Egypt ato, osi Egypt sabu jever sit on momogin anbabaton.

¹⁵ Ato on an werai Egypt an aiwab orot an babadis jever sit on sinai aiwab orot matanai jever an itin obin aurin on siduduran, ato sibo sinai aiwab orot an goai.

¹⁶ Egypt an aiwab orot inos Abram on robun Sarai, on fasinai on Abram aurin an obin iyamai an sheep a cow fani, donkey toub a tona fani, agirotis jever a orot fani a camel fani on ibogai isiwarai.

¹⁷ Baise BADA on sawau fesar wawanis iyafaren Egypt an aiwab orot a on an goa amonai sabu simama auris, yabin aiwab orot on Abram awan Sarai ibo awan mes on fasinai.

¹⁸ On mes Egyot aiwab orot on Abram iyor inat aurin ato itetemai iyau, “Om yau auriu aifan uiyamai? Om aibo mes men ukasoneu Sarai on om awam i?

¹⁹ Om aibo mes uyau, ‘Sarai on yau robu,’ on mes yau abo awau mes. Om awam atonio ebo ato rum wogat wonai!”

²⁰ Namon Egypt an aiwab orot an babadis dura wawaninai ifores sinai Abram awan rus siboes siyafares. Osi si gat on asi sawar tutufin osi ibinoanis on engon mat siboen sigat.