Zacarías 5 - Bible in Tzeltal de Oxchuc y TenejapaLa yil yilel balbil jun 1 Ay yan bila la quil yilel. La quil balbil ts'ibubil jun yac ta wilel ta toyol. La sjojc'obon te ch'ul abat: 2 —¿Bila yacat ta yilel? —xi'. La jac'bey: —Yacon ta yilel balbil ts'ibubil jun te yac ta wilele. Ay baluneb metro snajt'il soc ay chaneb metro soc lajuneb yoxwinic (50) centímetro te sjamalul —la cut. 3 Jich la yalbon: —Tey ts'ibubil ta xcha'jejch'el a te castigo ya xc'ot ta stojol te yajwal lum, teme ay mach'atic ya x'elc'ajique, soc teme ay mach'atic ay bila ya staic ta alel ta lote. 4 Te Cajwaltic te Spisil ya xju' yu'un jich yaloj ta jamal: “Jo'on ya jticun te castigo swenta yu'un ya me x'och ta sna te mach'a ya x'elc'aje, soc ya me x'och ta sna te mach'a ay bila ya stojol-tabon ta alel ta lot te jbiile. Te castigo tey me ya x'ain a, asta ja' to teme laj te sts'amte'al soc te tonetic yu'un te snae”, xi' me —xi' te ch'ul abate. La yil yilel moch swenta p'isjibal soc jtul ants 5 Tal te ch'ul abat yacon ta c'op soque, jich la yalbon: —Ila awil te bila chican ta ilel —xi'. 6 La jojc'obey, jich la calbey: —¿Bila a in to? —la cut. La sjac'bon: —A, ja' in to, moch swenta p'isjibal smulic te mach'atic nainemic ta lumq'uinale —xi'. 7 Te moch swenta sp'isjibal, macal sti'il. Te smajq'uil sti' pasbil ta plomo. La yich' jamel te smajq'uil sti'e. Tey nacal jtul ants a ta yutil te moche. 8 Te ch'ul abate la yalbon: —Ja' me ants in to ja' seña te bila amene —xi'. La sten xan coel ta moch, la smac ta smajq'uil pasbil ta plomo. 9 La quil xan, chicnaj tel cheb antsetic, ay xiq'uic, yacalic ta lich'el bael yu'un ic'. Te xiq'uique, jich yilel te bit'il xic' muc'ul cigüeña-mute. Yacalic ta yich'el bael ta ic' te moch swenta p'isole. 10 Te jo'on la jojc'obey te ch'ul abat yacon ta c'op soque. —¿Banti ya yich'ic bael te moche? —la cut. 11 La sjac'bon, jich la yal: —Ya xba spasbeyic stemplo ta Babilonia. Te c'alal ju'emix a te templo yu'une, ya me yaq'uic tey a, ya me yaq'uic ta yawil ta scajtijib —xi'. |
Biblia en Tzeltal de Oxchuc y Tenejapa © Sociedad Bíblica de México, A.C., 2001.
Bible Society of Mexico