Zacarías 3 - Bible in Tzeltal de Oxchuc y Tenejapa

La yil yilel jeltaybot sc'u'-spac' Josué

¹ Patil te Cajwaltic la yac'bon quil yilel te Josué, ja' te muc'ul sacerdote, teq'uel ta sit te ch'ul abat yu'un te Cajwaltique. Ta swa'el te Josué, teq'uel te Satanás chapalix yu'un ya x'och ta alel te smule.

² Te ch'ul abat yu'un te Cajwaltique, jich la yalbey te Satanás: —Ac'a scomat te Cajwaltique. Te Cajwaltic te c'ux ta yo'tan Jerusalén, ac'a scomat stuquel. Melel te winic pajal soc jch'ix xutumte' yac ta tilel, te la yich' loq'uesel tel ta yolil te c'ajq'ue —xi'.

³ Te Josué teq'uel ta stojol te ch'ul abat yu'un Cajwaltic, slapoj c'u'il te mero bayal ch'ailubene.

⁴ Te ch'ul abat la yalbey mandal te sjo'tac te yacuc sloq'uesbeyic te ch'ailuben c'u'il slapoj te Josué. Patil jich la yalbey: —Ila awil, ja' me seña te la jch'aybatix te muliletic awu'une. Yo'tic ya cac'batix alap c'u'il te buen t'ujbile —xi'.

⁵ Ora nax la spas ta mandal te sjo'taque, swenta yu'un ya yac'bey sbejch'il pac' ta sjol te Josué. Te sbejch'il pac' la yac'bey ta sjole, mero lec, ma'yuc jxujt'uc ch'ailuben. Patil la yac'beyic slap buen t'ujbil c'u'il. Te c'alal jich yacalic ta spasele, te ch'ul abat teq'uel tey a.

⁶ Te ch'ul abat yu'un te Cajwaltic, jich la yalbey te Josué:

⁷ —Jich ya yal te Cajwaltic te Spisil ya xju' yu'une: “Ja' me xat'unbon te be cu'un; ac'a me c'otuc ta pasel awu'un spisil te bitic ay ta awenta spasel cu'une. Teme jich ya apase, ya me x'och ta awenta te templo cu'une. Ya me acanantay te templo, soc ta spisil te yamac'ule. Ya me cac'bat awawil ta yolilic te ch'ul abatetic te ayic ta abatinel cu'une. Josué, ja'at te muc'ul sacerdoteat,

⁸ aiya me awaiy ta lec, soc ac'a me yaiyic te ajo'tac ta sacerdoteile. Ta apisilic te ja'exe, señaex te bila ya xc'ot ta pasel ta patil. Ya me quic' tel te cabat, te ja' te spul c'oeme.

⁹ Jo'on la cac'bey ta stojol Josué te ton te ay juqueb yelawe, jo'on nix ay bi ya jts'ibuy tey a. Ta patil ta jun nax me c'aal ya jlajinbey smul te lume.

¹⁰ Te c'alal ya xc'ot sc'aalelal, ya me xju' te talel c'axel ya awic' abaic ta yaiybeyel yutsilal te lamal q'uinal ta yaxinal ats'usubiletic soc higueraetic awu'unic. Jo'on, Ajwalilon te Spisil ya xju' cu'une ya cal ta jamal”, xi' me te Cajwaltic —xi' te ch'ul abate.