Zacarías 2 - Bible in Tzeltal de Oxchuc y Tenejapa

La yil yilel ch'ajan swenta sp'isjibal

¹ Ay to yan bila la quil yilel. Chicnaj tel ta jtojol jtul winic, yich'oj ta sc'ab ch'ajan swenta sp'isjibal.

² La jojc'obey: —¿Banti ya xbaat? —la cut. La sjac'bon: —Ya xboon ta sp'isel te lum Jerusalén, swenta yu'un ya yich' na'el a te jayeb te snajt'ile soc te sjamalule —xi'.

³ La quil bajt' te ch'ul abat c'opojon soque. Ay tal yan ch'ul abat ta stojol,

⁴ jich albot yu'un: —Baan ta animal, baan albeya te querem yich'oj ch'ajan swenta sp'isjibal: “Te Jerusalén ya xcha'och xan yajwal. Mero bayal me te yajwal soc bayal me xchamsbalam, te ma xju' ya yich' aq'uel sjoyob ts'ajc'ule.

⁵ Pero te Cajwaltic jich yaloj te ja' me sts'ajc'ul c'ajc' c'oem yu'un ta sjoyobal te Jerusalén; soc ta yolil te lum ya me yac' ta ilel te yutsilale”, uta me —xi' te ch'ul abate.

Cajwaltic ya scoltay te lum yu'une

^6-7 Te Cajwaltic tulan ya yal: —Jo'on te la cac' pujc'anic bael ta xchanxujc'ul te q'uinale. Pero yo'tic, ya calbeyex: Ananic loq'uel ta ora te banti q'uinal ta norte. Colanic loq'uel ta Babilonia, te banti ac'bilex ta nainel te ja'ex te ac'bil awijq'uitayic alumalique, ja'ex te nainemex ta Sión ta nameye. Jo'on, Ajwalilon, jich ya cal —xi'.

^8-9 Te Cajwaltic te Spisil ya xju' yu'un, la sticunon ta yalel te c'op swenta castigo ta stojolic te nacionetic la spojbeyex abiluquic te ja'exe: —Mach'auc a te ya yuts'inbon te lum cu'une, jo'on xchulel jsit ya yuts'inbon c'oem abi. Ja' yu'un jo'onix ya x'at'ejon ta yaq'uel castigo te nacionetique, ya me cac' te ya yich' pojbeyel sbiluc yu'un te mach'atic smozoineje —xi'. Jich ya yac' ta ilel te yutsilal te Cajwaltic, te Spisil ya xju' yu'une. Jich me ya ana'ic a te ja' te Cajwaltic, te la sticunon tel.

¹⁰ Te Cajwaltic tulan ya yal: —Ja'ex yajwalex Jerusalén, c'ajinanic ta swenta yutsil q'uinal awaiyic, melel ya me xtalon ta nainel ta awolilic —xi'.

¹¹ Te c'alal jich ya xc'ot ta pasele, bayal me nacionetic jun nax ya xc'otic soc te Cajwaltique. Jich me ya yal te Cajwaltic: —Te nacionetic ja' nix lum cu'un, jo'on me ya xnainon ta yolilic —xi' me. Jich me ya ana'ic a te ja' la sticunon tel te Cajwaltic te Spisil ya xju' yu'une.

¹² Te Cajwaltic, ya me yic' xan ta stojol te Judá. Ya me yu'unin te ja' mero tsabil yu'un te ay ta ch'ul lumq'uinale, soc ya me yalbey xan sc'oplal te Jerusalén te ja' tsabil lum yu'une.

¹³ Spisil ants-winiquetic, ch'abanic me ta stojol te Cajwaltique. Melel ya xtal ta jtojoltic te Cajwaltique, tey to ya xjach tel ta ch'ul awilal ta banti naineme.