Tito 2 - Bible in Tzeltal de Oxchuc y Tenejapa

Te lequil p'ijubtesele

¹ Te ja'ate, ja' me x'awat'elin yalel te lequil nopjibale.

² Te jtatiquetique ya sc'an ya sna' stsajtayel yo'tanic, soc te lec yo'tanique, soc te ma xjelawique. Ya sc'an te ay lec xch'uunjel yo'tanic soc xc'uxul yo'tanic, soc te ya sts'ijc' yu'unique.

³ Ja' nanix jich uuc te jme'tiquetique. Ya sc'an te buen lec ayic ta q'uinale, te ma xlewanic ta c'ope, te ma smosoinotic yu'un te yacubele, soc te ja' ya yaq'uic ta nopel te bila lec ta pasele.

⁴ Jich me ya yac'bey snopic te jch'iel antsetic te bit'il ya sc'an te c'ux ya yaiy ta yo'tanic te smamlalique soc te yalataquique,

⁵ soc te lecuc ya xc'opojique, te ma'yuc mulil ta yo'tanique, te ya sna'ic scanantayel te snaique, te ay yutsil yo'tanique, soc te jun yo'tan ya xch'uunbeyic smandal te smamlalique, swenta yu'un ma'yuc ta toybac'optayel te sc'op Diose.

⁶ Ja' nanix jich ya sc'an ya atac'uy uuc te muc'ul queremetic te ma xjelawic uuque.

⁷ Soc te ja'ate ac'a me ta ilel lequil ejemplo ta swenta te lequil at'elile. Te c'alal ya ap'ijubtese, ts'acal me xawal, soc bayaluc me sc'oplal ta awo'tan.

⁸ Ja' me xawal te lequil c'op te ma xju' ta controinele. Tey me ya xq'uexawic a te mach'atic ya scontroinexe, te melel ma xwejt' yu'unic te bila ya yac'beyex amulinique.

⁹ Tac'uya te abatetique. Junuc me yo'tan ac'a xch'uunbeyic smandal te yajwalique. Jich me lec yo'tan yu'un te yajwalique. Ma me sujt'esic te bila ya x'albotique.

¹⁰ Soc ma me xyelc'anbeyic sbiluc te yajwalique. Ac'a me yaq'uic ta ilel te junajem yo'tanic ta stojole, swenta yu'un jich me ya xchicnaj te bit'il jelawen yutsil te p'ijubtesel yu'un te Diose te Jcoltaywanej cu'untique.

¹¹ Melel la yaq'uix ta ilel te Diose te bit'il ay yutsil yo'tan cu'untic te bit'il ja' ta swenta te ayix colel yu'un ta stojol spisil te ants-winiquetique.

¹² Ayotic ta p'ijubtesel yu'un te bit'il ya sc'an ya xjil cu'untic spisil te bila amene soc spisil te bila mulanbil sba ta pasel ta balumilale. Soc ya sc'an te ma xjelawotique, ya sc'an toj ya cac' jbatic, ya sc'an te spisil ora ay ta co'tantic Dios te jayeb c'aal ayotic ta q'uinale.

¹³ Ya sc'an ya jmaliytic spisil ora te bila jelawen yutsil ya xc'ot ta pasele. Ja' bi ja' te ya xchicnaj tel soc yutsil yu'el te mach'a muc' Dios te ja' Jcoltaywanej cu'untique, ja' te Jesucristoe.

¹⁴ Ja' la yac' sba ta lajel ta jwentatic stuquel. Jich la scoltayotic loq'uel ta bay te bila amen jpasojtique, soc jich la yutstesbotic co'tantic swenta yu'un lumotic yu'un ya xc'ot te toyol co'tantic ta spasel spisil te bila lec ta pasele.

¹⁵ Ja' me ya awac' ta nopel spisil in to. Aiya me tac'uywanej soc comaw te bit'il tulan awat'el awich'oje. Ma me ayuc mach'a ya sp'ajat ta yo'tan.