Sofonías 3 - Bible in Tzeltal de Oxchuc y Tenejapa

Smul Jerusalén soc bit'il ya sta coltayel

¹ ¡Ya me awil awocol, lum Jerusalén, te toybaate, bolobenat soc j'uts'inwanejat!

² Ma la ach'uunbey sc'op te Cajwaltique; ma la awich' ta muc' te tojtesel yu'une. Ma la smuc'ulin awo'tan; ma ba baat ta stojol te Dios awu'une.

³ Te jtsobwanejetic awu'un jich ya x'awunic te bit'il león-choj; te jchajbanwanejetic awu'un jichic te bit'il ja'mal ts'i'ta jochol taquin q'uinal, ma'yuc jch'ixuc bac ya yijq'uitay ta swenta te pajele.

⁴ Te j'alwanejetic awu'unique ya x'ixta-c'opojic; ya x'ac'awanic ta c'abal. Te sacerdoteetic awu'unique ya sboltesic te ch'ul templo; ya xc'axintaybeyic te smandal te Cajwaltique.

⁵ Ja'uc me to, te Cajwaltic ay ta alumalic; ja' ya spas stuquel te bila leque, ma ja'uc te bila amene. Ta jujun sab ma xch'ay ta yo'tan ya yac' chicnajuc te stojil yat'ele. Yan te mach'a amene, ma sna'bey sba te q'uexlale.

⁶ Ya yal te Cajwaltique: —Jinojix te nacionetique; la jinbeyix coel te ts'ajq'uetic yu'un. Jochol la quijq'uitayix te calleetic yu'une; ma'yuquix ants-winiquetic ya xc'axic tey a. Jc'axel ma'yuquix bila ay ta lumetic; ma'yuquix, ni jtuluc yajwal.

⁷ La jnop ta co'tan: “Jich me ya xi'on te Jerusalén; ya me yich' ta muc' te tojtesel ya cac'beye”, yoon ta co'tan. Jich ma ba ya yich' jinel te banti nainem te ya cac'bey castigoe. Ja'uc me to, la yaq'uic puersa ta spasel spisil ta jchajp bitic amen.

⁸ Jich yu'un, maliyawonic te bi c'aalil ya xtejc'ajon ta c'op ta controinbelat. Jo'on Ajwalilon tulan ya cal: Jnopoj ta co'tan ya jtsob te nacionetic soc te muc' ajwaliletique swenta yu'un ya cac'bey ta stojolic te quilimba, ja' te quilimba te yac ta tilele. Spisil lumq'uinal ya me yich' jinel ta scaj te sc'ajc'al co'tane.

⁹ “C'alal ya xc'ot ta pasel, ya jlecubtesbey sc'op te lumetique, swenta yu'un spisilic me ya sc'opononic, swenta yu'un ta spisilic ya me yac' sbaic ta abatinel cu'un.

¹⁰ Ta bay jejch' ja'etic yu'un Etiopía, te lum cu'un te pujq'uemic baele ya me xtal yalbonic wocol, ya me yich'bonic tel majt'aniletic.

¹¹ Te bi ora ya xc'ote, lum cu'un, ma ba ya xq'uexawatix yu'un ni jchajbuc te at'eliletic te la atoy aba ta jtojol yu'une. Melel ya me jloq'uesbat bael ta atojol te jtoybaetic soc te mach'atic muc' yac'oj sbaique; soc ma ba ya awac' xan ta ilel te muc' ya awac' abaic ta bay ch'ul wits cu'un.

¹² Ya quijq'uitaybat jilel mach'atic peq'uel yac'oj sbaic, te ma'yuc bila ay yu'unic, te ya smuc'ulinon yo'tanique.

¹³ Te mach'atic cuxulic xan ta lum Israel ma'yuquix bila ma lecuc ya spasic, ma ba ya yalic lot, ma ba ya snojes lo'laywanej ta yeic. Ya me xju' ya xwe'iquix soc ya me xcux yo'tanic, ma me ayuc xiwel ta stojolic —xi' te Cajwaltique.

C'ayoj yu'un sbujts'-o'tanil ta Jerusalén

¹⁴ C'ajinan, lum Sión; c'opojanic yu'un sbujts'-o'tanil, lum Israel. Bujts'najuc awo'tan, Jerusalén; bujts'najuc ta spisil awo'tan.

¹⁵ Te bit'il chapal ac'oplal te ya awich' castigo, la slajinbeyix sc'oplal te Cajwaltic, soc la stenix bael te acontrotaque. Te Cajwaltic, te Muc' Ajwalil yu'un Israel, ay me ta awolilic; ma'yuc bila amen ya axi'ic.

¹⁶ Te bi c'aalil ya xc'ote, jich ya x'albot te Jerusalén: “Ma me xiwat, Sión, ma me ayuc ac'ab te ma'yuc yipe”, xi' me.

¹⁷ Te Cajwaltic te Dios awu'une, ay me ta awolilic; ay yu'el stuquel soc ya scoltayat. Te Cajwaltic bin nax me yo'tan awu'un. Ta swenta xc'uxul yo'tan ya yac'bat yach'il acuxlejal; ya me xbujts'naj awo'tan ta c'ayoj

¹⁸ jich bit'il ta sc'aalelal te q'uine. Jich ya yal te Cajwaltique: —Jo'on ya cac'at ta libre yu'un te bila amen te chapal ac'oplal yu'une, ja' te q'uexlal te ay yalal ta atojole.

¹⁹ Ja' me jich yorail te ya x'at'ejon ta scontroinel spisil te mach'atic ya stenat ta uts'inele. Ya jcoltay te chij te coxoe; soc ya me quic' tel te bay ch'ayemique. Ya jc'atp'un ta ich'el ta muc' te ilayel ta atojole; soc ya xpujc' ac'oplal ta spamal q'uinal.

²⁰ Te bi c'aalil ya xc'ote ya quiq'uex tel te ja'exe, ya jtsobex. Ya me jeltay te bila c'oem ta awentaique; soc ya cac' xpujc' ac'oplalic. Ya x'ich'otex ta muc' ta stojol spisil te lumetic ay ta balumilale. Jo'on Ajwalilon te jich caloje —xi'.