Sofonías 1 - Bible in Tzeltal de Oxchuc y Tenejapa

Sc'aalelal yilimba Cajwaltic

¹ Ja' sc'op Cajwaltic te la yalbey te Sofonías, te c'alal ay ta muc' ajwalil ta Judá te Josías te snich'an Amón. Te Sofonías ja' snich'an Cusi, te ja' snich'an Gedalías, te ja' snich'an Amarías, te ja' snich'an te Ezequías.

² Tulan ya yal te Cajwaltique: —Jc'axel me ya jlajin ta spisil te bitic ay ta sba te balumilale.

³ Ya jlajin te ants-winiquetic soc te chambalametique; ya jlajin te mutetic soc te chayetique. Ya sc'ojch'in sba te mach'atic amen yo'tanique; soc ya jch'ay ta balumilal te ants-winiquetique —xi'. Tulan ya yal xan te Cajwaltique:

⁴ —Ya me jtoy bael jc'ab ta scontroinel te lum Judá soc ta scontroinel spisil te mach'atic nainemic ta Jerusalén. Ya jch'ay ta jc'axel te lotil dios Baal, soc sbiilic te sacerdoteetic yu'une.

⁵ Ya jlajin te mach'atic ya xmoic ta sba sna te ya xch'uunic te eq'uetique, soc te mach'atic ya squejan sbaic te ay bila ya yalic ta jamal te ya stabonic ta alel jbiil a soc sbiil te lotil dios Milcom.

⁶ Ja' nix jich ya jlajin te mach'atic ya xchebaj yo'tanic ta jtojole, te mach'atic ma ba ya sleonic soc ma xnoptsajic tel ta sjojc'oyel te jc'ope —xi'.

⁷ Ch'abanic ta stojol te Cajwaltique; melel te sc'aalelal Cajwaltic nopol ayix tel. Te Cajwaltic xchajbanej milbil majt'anil soc xchajbanejbey te mach'atic yic'oje. Jich ya yal te Cajwaltique:

⁸ —Te sc'aalelal te milbil majt'anile ja' ya cac'bey castigo a te jtsobwanejetic, te mach'atic snich'nab te muc' ajwalil, soc spisil te mach'atic ya slapic jchajp c'u'iletique.

⁹ Ja' nix jich ja' sc'aalelal ya cac'bey castigo a te mach'atic ya swiluntay c'axel te smarcoil ti'naile (ja' sc'oplal te mach'atic ya yich'ic ta muc' te loc'ombae); soc te mach'atic ya snojesic ta uts'inel soc ta lo'laywanej te sna yajwalique —xi'.

¹⁰ Tulan ya yal te Cajwaltique: —Te bi c'aalil ya cale ya me x'aiyot stojol awetic yu'un sc'anel coltayel c'alal ta Ti'nail yu'un Chayetic. Ya me x'awunic te yajwal Xchebal Barrio, soc ay me xpumlajan nax sc'op te ya xjem coel te ch'in witsetique.

¹¹ Ajc'anajanic me te ja'exe, yajwal Barrio yu'un Mortero, melel spisil te jchonbajeletic ya me xlajic; spisilic te mach'atic ya yaiyic manbajel ta taq'uin ya me yich'ic lajinel.

¹² “Ja' me yorail te ya jtsac yawil c'ajc', yu'un ya quil spamal a te Jerusalén. Jich me ya cac'bey castigo te ants-winiquetic te lamal q'uinal ya yaiyic ta sc'opique, jich bit'il vino te slamoj sbae, te ya yal ta yo'tanic: “Te Cajwaltic ma'yuc bila ya spas, ni lec ni amen”, te xiique.

¹³ Jich yu'un te sc'ulejal ya me yich' pojel loq'uel, soc te snaic ya me yich'ic jinel. Ya spas snaic, ja'uc me to, ma ba ya snainic; ya sts'unic ts'usubiletic, ja'uc me to, ma ba ya yuch'beyic ya'lel —xi'.

¹⁴ Nopol ayix tel smuc'ul sc'aalelal te Cajwaltique; nopol ayix tel, animal nax me ya xtal. Muc' me ya xbulan sc'opic te c'alal ya yilbeyic sc'aalelal te Cajwaltique. Ya me xch'aub q'uinal yaiyic yu'un asta ya x'awunic te mach'atic tulanique.

¹⁵ Ja' me sc'aalelal ilimba, mel-o'tan soc woclajel, jinel ta jc'axel, ijc' q'uinal soc ajc'ubal, potsel ta tocal soc pimil axinal.

¹⁶ Ja' me sc'aalelal ta oq'uesinel oq'ues soc aw ta scontroinel te lumetic te tulanic sts'ajc'ul soc te ay toyol balal ts'ajq'uetic yu'unique.

¹⁷ Ya yal te Cajwaltique: —Ya me cac'bey swocol te ants-winiquetique. Jich me ya xbeenic te bit'il ma'sitetic, melel la sle smulic ta jtojol. Bayuc nax ya xmal xch'ich'elic jichuc tan, soc te sbaq'uetalic jich me ya yich' tsobel te bit'il stsa' chambalametic —xi'.

¹⁸ Ta sc'aalelal yilimba te Cajwaltique, te ants-winiquetic ma xcoltayotic yu'un te plata soc te oro yu'unique. Melel te sc'aal yilimba Cajwaltic ya xlilaj ta c'ajq'uel yu'un spisil te lumq'uinale. Spisilic te mach'atic ayic ta balumilal ajc' nax ya yich'ic jinel ta jyalel.