Salmos 99 - Bible in Tzeltal de Oxchuc y Tenejapa

Cajwaltic muc' ajwalil mero toyol yat'el

¹ Te Cajwaltic ja' muc' ajwalil stuquel; ya xnijc' te lumetic yu'une; Nacal ta smuc'ul nactijib ta sba te querubinetique. Ya xnijc' te lumetic soc spamal balumilal.

² Te Cajwaltic muc' sc'oplal ta wits Sión; toyol ay ta stojol spisil te lumetique.

³ Ayuc me ta alel yutsil sc'oplal, te muc' stuquel soc te xiweltic nax sba. ¡Ja' Ch'ul Dios stuquel!

⁴ Ja'at muc' ajwalilat te bayal awu'el, te lec awo'tan yu'un te bila toj ta pasele; ja'at la achajban te pajal ay ta c'uxtayel te ants-winiquetique. Lec yacat ta xchajbanel soc ta stojtesel te snich'nab Jacob.

⁵ Albeyaic yutsil sc'oplal Cajwaltic te Dios cu'untic, quejana abaic ta stojol. ¡Ja' Ch'ul Dios stuquel!

⁶ Te Moisés, Aarón soc ta spisil te sacerdoteetic yu'un Dios, soc te Samuel, jun ayic soc te mach'atic la yalbeyic yutsil te sc'oplale. Te Cajwaltic la sjac'bey sc'op ta spisilic te c'alal la sc'anbeyic te coltayel yu'une.

⁷ Te Dios c'opoj soc c'alal to ta bay xtomet te tocale; la sc'otesic ta pasel te mandalil te ac'botic yu'une.

⁸ Cajwal, Dios cu'un, ja'at la ajac'bey te sc'opique. Ja'at te Diosat yu'un te jpas-perdone, pero la nix awac'bey castigo yu'un te bitic amen la spasique.

⁹ Albeyaic yutsil sc'oplal te Cajwaltic, ja' te Dios cu'untic; quejana abaic ta stojol ta bay te ch'ul wits yu'une. ¡Te Cajwaltic Dios cu'untic, ja' ch'ul Ajwalil stuquel!