Salmos 98 - Bible in Tzeltal de Oxchuc y Tenejapa

Cajwaltic la yaiyix tsalaw

¹ C'ajintayaic Cajwaltic ta yach'il c'ayoj, yu'un jchajp nax a te yat'el spasoje; la yaiyix tsalaw ta smuc'ul yu'el soc te xch'ul-c'abe.

² Te Cajwaltic la yalix ta bayuc te la yaiyix tsalawe; la yaq'uix ta ilel ta stojol lumetic te toj yo'tan stuquele.

³ Ma ba ch'ayem te xc'uxul yo'tan soc te bit'il jun yo'tan ta stojol te lum Israel yu'une. C'alal to ta slajibal bael balumilal, ilotix te bit'il jtsalwanej stuquel te Dios cu'untique.

⁴ C'ajintayaic Dios soc yutsil awo'tanic ta apisilic te nainemex ta balumilal; jamaluc nax me q'uinal awaiyic soc yutsil awo'tanic, soc c'ajintayaic ta c'ayoj.

⁵ C'ajintayaic ta c'ayojetic te Cajwaltique soc arpa soc te yantic bitic ay scuerdaile.

⁶ C'ajinanic soc yutsil awo'tanic ta stojol Cajwaltic te ja' Muc' Ajwalile; c'ajinanic soc te bitic ya xc'opojic te ya yich'ic oq'uesinele.

⁷ Ac'a me awunuc te mar soc spisil bitic ay yu'un, te balumilal soc te mach'atic tey nainemic a.

⁸ Ac'a me spac' sc'abic te muc'ja'etic; junuc me ac'a yac' sbaic ta aw te witstiquil yu'un sbujts' yo'tanic

⁹ ta stojol te Cajwaltic. Melel ya xtal ta mandalteswanej ta spamal balumilal; ya xmandalaj ta swenta stojil-o'tanil, soc mero pajal ya xc'uxtaywan.