Salmos 96 - Bible in Tzeltal de Oxchuc y Tenejapa

Yach'il c'ayoj ta stojol Cajwaltic

¹ C'ajintayaic Cajwaltic ta yach'il c'ayoj; c'ajintayaic Cajwaltic, apisilic te nainemex ta balumilale;

² c'ajintayaic Cajwaltic, lecuc me sc'oplal awu'unic; jujun c'aal albeyaic sc'oplal ta bayuc te colel yu'une.

³ Albeya sc'oplal yutsilal soc te jchajp nax bitic spasoje; albeyaic sc'oplal ta stojol spisil ta jchajp te lumetique.

⁴ Melel te Cajwaltic muc' ta jyalel, soc mero jich ya sc'an albeyel yutsil sc'oplal stuquel; xiweltic me sba yu'un spisil a te yantic cuybilic ta Diose.

⁵ Te diosetic yu'un te yantic lumetic, ma'yuc sc'oplalic ta jc'axel; yan te Cajwaltic ja' la spas te ch'ulchane.

⁶ Yich'oj bayal xojobil soc yutsilal; ay yu'el soc t'ujbil yutsilal ta ch'ul templo.

⁷ Ja'ex chajbalchajp na ta lumetic, albeyaic yutsilal te Cajwaltic; albeyaic yutsil yu'el soc xojobil.

⁸ Ac'aic ta ich'el ta muc' te Cajwaltic te bit'il jich ya sc'an pasele; ochanic bael ta templo soc majt'aniletic yu'un.

⁹ Quejana abaic ta stojol Cajwaltic ta t'ujbil templo yu'une; xiwanic me ta stojol ta apisilic.

¹⁰ Albeyaic te nacionetic te ja' muc' ajwalil stuquel te Cajwaltique. Ja' la yac'bey yiptajib te balumilal swenta yu'un ma stij sba; ja' te pajal yac ta mandal ta stojol te lumetique.

¹¹ Binuc nax me yo'tanic te ch'ulchan soc balumilal; ac'a awunuc soc yip te mar soc spisil te bitic ay yu'une.

¹² Binuc nax me yo'tanic te lumq'uinal soc spisil te bitic ay yu'un; ac'a awunuc yu'un sbujts' yo'tanic te te'etic

¹³ ta stojol te Cajwaltic te ya xtale. Yac, ya me xtal mandalajuc ta balumilal; ya xmandalaj ta stojol te lumetic ta q'uinal. Toj te mandaltesel yu'un soc puro ta smelelil.