Salmos 94 - Bible in Tzeltal de Oxchuc y Tenejapa

Cajwaltic jchajbanwanej ta balumilal

¹ Cajwal, ac'a aba ta ilel, ja'at Diosat te ya awac'bey spacol.

² Ja' jchajbanwanejat ta balumilal atuquel; jajch'an tel, la', ila aba soc te mach'atic stoyoj sbaique, ac'beya stojic te bit'il ya sc'ane.

³ Cajwal, ¿jayeb me c'aal te bujts'an nax yo'tanic te mach'atic amen yo'tanique?

⁴ Spisil te mach'atic amen yat'elic, j'ixta-c'opetic soc jtoybaetic, cajal yac'oj sbaic.

⁵ Cajwal, ya sjinic te lum awu'un; ya yac'bey swocolic te mach'atic awu'une.

⁶ Ya smilic te me'ba antsetic soc te jyanlumetic; ya yaq'uic ta lajel te mach'atic me'ba alaletique.

⁷ Ya scuyic te ma xyil te Cajwaltique; ya yalic te ma sna' stojol te Dios yu'un Jacob.

⁸ C'otuc ta awo'tanic, ja'ex ants-winiquetic te jich nax ayex ta q'uinal, te ma'yuc bi ya xc'ot ta awo'tanique. ¿Bi ora ya ana'ic stojol?

⁹ ¿Ya bal acuyic te ma xyaiy stojol te mach'a la spas te jchiquintique? ¿Ya bal acuyic te ma xyil te mach'a la yac' te jsitique?

¹⁰ ¿Yu'un bal ya acuyic te ma xyac' castigo te mach'a ya stojtes te nacionetique? ¿Yu'un bal ya acuyic te ma sna' stojol te mach'a ya sp'ijubtes te ants-winique?

¹¹ Te Cajwaltic ya sna'bey yo'tan te ants-winiquetic te tojol nax te bila ya snop ta yo'tanique.

¹² Cajwal, bin nax me yutsil te mach'a ya atojtes soc te ya awac'bey te p'ijubtesel awu'une,

¹³ swenta yu'un ma'yuc bi ya xc'opoj yo'tan yu'un te c'alal ya xc'ot yorail te wocole, te jich ora ya xjoc'bot smuquenal te mach'a amen yo'tane.

¹⁴ Te Cajwaltic ma ba ya spijt'es te lum yu'un; ma xyijq'uitay jilel stuquelic te mach'atic yu'unineje.

¹⁵ Te jchajbanel ya xtojob ta chajbajibal; soc spisil te mach'a lec yo'tan ya me st'unic.

¹⁶ ¿Mach'a ya xjajch' tel te ya xc'opoj cu'un ta scaj te mach'atic amen yat'elique?

¹⁷ Te manchuc la scoltayon te Cajwaltic, ayonix ta bay ch'abal nax q'uinal yu'un lajel te jichuque.

¹⁸ Te bi ora la cal: “Ya xbilts'uj cacan”, te xoone, te xc'uxul awo'tan, Cajwal, tal scoltayon te tulan ya jtejc'an jbae.

¹⁹ Te c'alal ayon ta mel-o'tan yu'un a te bayal bitic ya xc'opoj co'tan yu'un, te ya yuts'inbon te jole, ja'at ya amuc'tesbon co'tan soc ya awac'bon sbujts' co'tan.

²⁰ Te ja'at ma xju' ya ajoin te mach'atic ma stojiluc ya xchajbanwane, te ma lecuc ya x'at'ejic soc te ma ja'uc ya stuuntesic te mandaliletique.

²¹ Ya xchajbanbeyic sc'oplal te mach'a ma'yuc bila amen spasoj, ya yaq'uic bael ta lajele.

²² Yan te Cajwal ja' anjibal cu'un stuquel; te Dios cu'un muc'ul toyol ton c'oem te ya scoltayone.

²³ Te Cajwal ya me sjin ta jc'axel te mach'atic amenic ta scaj te ma lecuc te bitic ya spasique; te Dios cu'un ya me sjin ta jc'axel.