Salmos 93 - Bible in Tzeltal de Oxchuc y TenejapaJa' muc' ajwalil te Cajwaltic 1 Te Cajwaltic ja' muc' ajwalil. Te Cajwaltic sc'u'inej yutsilal soc joytaybil ta yu'el. Ja' la yac'bey yiptajib te balumilal swenta yu'un ma stij sba. 2 Cajwal, ta xjajch'ibal to stalel ay yiptajib ta lec te amuc'ul nactijibe; te ja'at atalel ayat sbajt'el q'uinal. 3 Cajwal, te muc'ja'etic tulan ya xc'opojic soc mero muc' ya swiles sbaic soc te yipe. 4 Yan te ja'at Cajwal, te ayat ta toyol, cajal xan awu'el a te bit'il yip sbul te mare, soc te bit'il ya xc'opoj te mare. 5 Cajwal, te mandaliletic awu'un mero ma xch'ay stuquelic; te ach'ul-utsilal ja' xch'alil sbajt'el q'uinal te templo awu'une. |
Biblia en Tzeltal de Oxchuc y Tenejapa © Sociedad Bíblica de México, A.C., 2001.
Bible Society of Mexico