Salmos 92 - Bible in Tzeltal de Oxchuc y Tenejapa

C'ayoj ta yalel yutsilal Dios

¹ Cajwal, te mero Toyolat, lec ya caiy te ya x'albotat awutsilal, soc te ya yich' c'ajintayel c'ayoj ta swenta awich'el ta muq'ue.

² Ya calbey sc'oplal ta sab te smuc'ul xc'uxul awo'tan, soc ya calbey sc'oplal ta ajc'ubal te bit'il jun awo'tan ta jtojol;

³ ya me cal ta swenta sc'op te bitic ay scuerdail, te arpa t'ujbil sc'op, soc te yantic músicaetique.

⁴ Cajwal, ja'at awac'ojbon yutsil co'tan yu'un te awat'ele; te at'eliletic awu'un ya snojesbonic yutsil co'tan.

⁵ Cajwal, mero muq'uic ta jyalel te awat'ele; mero muc' te bitic ay ta awo'tane.

⁶ Ja' nax te mach'atic ma sna'ic q'uinal, ma xc'ot ta yo'tan stuquelic.

⁷ Te mach'atic amen soc yat'elic ya xch'iic ta ora jich bit'il wamal, pero ja' nax me ya xch'iic yu'un te ya yich'ic jinel sbajt'el q'uinale.

⁸ Yan te ja'at Cajwal, sbajt'el q'uinal ayat ta toyol.

⁹ Cajwal, ja' mero smelelil te ya yich'ic jinel te acontrotaque; ta spisilic te mach'atic amen yat'elic ya me yich'ic puquel bael.

¹⁰ Ja'at ya atoyesbon quip, jich ya xc'ot quip te bit'il yip toro, soc ya amalbon perfume ta jol.

¹¹ Ya me quil bit'il ya xyalic te jcontrotac; ya me caiybey yajc'anic te mach'atic amenique.

¹² Te mach'atic lec yat'elic ya xnichinic c'oem jichuc palma, soc ya xch'iic jich te bit'il cedroetic ta Líbano.

¹³ Ts'unbilic c'oem ta templo yu'un te Cajwaltic; ya xnichinic ta yutil templo yu'un te Dios cu'untique.

¹⁴ Ya to sitin c'oem teme mamalix ae; puersa tulanic ta jyalel soc stalel yaxic.

¹⁵ Ya yalbeyic sc'oplal te Cajwal te ja' jcanantaywanej cu'un, te toj yo'tan, te ma'yuc bila amen ya spase.