Salmos 91 - Bible in Tzeltal de Oxchuc y TenejapaJa' anjibal cu'untic te Cajwaltic 1 Te mach'a ay ta canantayel yu'un Dios te mero Toyole, te ay ta yaxinal te Mach'a Spisil ya xju' yu'une, 2 jich ya yal ta stojol te Cajwaltique: “Ja'at anjibalat cu'un ja' nac'jibalat, Dios cu'un, te smuc'ulinejat co'tan”, xi' me ta stojol. 3 Ja' nax stuquel ya xju' ya scoltayat ta bay pejts'etic soc bitic tulan chamelil swenta lajel; 4 ya me sluts'at ta yet'al xic' c'oem, jich me jun awo'tan. Te bit'il jun yo'tan ta atojol ya me scanantayat; ja' amajq'uil c'oem. 5 Ma x'axi' te bitic ya xiwteswan ta ajc'ubal, ma me xiwat yu'un te t'im te ya yich' t'imuyel ta c'aaleltique, 6 ma me x'axi' te tulan chamel ya xbeen ta ajc'ubal, soc ma me x'axi' te bila ya xmilawan ta olil c'aale. 7 Ay me jmil ya xlajic ta stojol aq'uexen soc ay me lajunmil ya xlajic ta awa'el; ja'uc me to, ma'yuc bi ya staat, ni jtebuc te ja'ate. 8 Ja' nax me ya awil te ya x'ac'bot stojic te mach'a amen yo'tanique. 9 Te bit'il awac'oj smuc'ul awo'tan te ja' anjibal awu'un te Cajwaltique, soc te bit'il ja' ya scoltayat te Dios te mero Toyole, 10 jich ma'yuc bila amen ya xtal ta atojol, soc ma x'och chamel ta ana. 11 Melel te Cajwaltic ya sticun tel ch'ul abatetic yu'un, ya scanantayat bayuc ya xbaat. 12 Ya me slicat ta sc'abic swenta yu'un ma ba ya alajin awacan ta ton. 13 Ya me xju' ya xbeenat c'axel ta bay león-chojetic, soc te chambalametic ay ta xi'el, soc te jti'awal chanetique. 14 Ya yal te Cajwaltic: “Jo'on ya jcoltay loq'uel spisil a, ma'yuc bi ya xtaot yu'un, melel c'uxon ta yo'tan soc ya sna'bon jba. 15 Te c'alal ya sc'oponon, ya me caiybey sc'op; C'alal ay swocol ya me xtalon ta sts'eel. Ya me cac' ta libre; ya me cac'bey yutsilal ta ich'el ta muc'. 16 Ya me cac'bey smulan najt' xcuxlejal ta q'uinal; ya me cac'bey smulan ta lec te coltayel cu'une”, xi' te Cajwaltique. |
Biblia en Tzeltal de Oxchuc y Tenejapa © Sociedad Bíblica de México, A.C., 2001.
Bible Society of Mexico