Salmos 90 - Bible in Tzeltal de Oxchuc y Tenejapa

LIBRO 4 Sbajt'el q'uinal ay te Diose, c'axel nax ay te ants-winiquetique

¹ Cajwal, ja'at jcanantaywanejat cu'untic te jaycaj yacalotic ta c'axel ta q'uinale.

² Te c'alal ma to ayuc a te witstiquil, te c'alal ma to ayuc a te lumq'uinal soc spisil bitic ay, c'alal to ta mero namey soc ja' to c'alal ta patil bael, ja'at atalel Diosat atuquel.

³ Ya awac' sujt'uc ta ts'ubil lum te ants-winiquetic te c'alal ya awal: “C'atp'ujanix ta ts'ubil lum yal-snich'nab ants-winiquetic”, teme xaate.

⁴ Melel te jmil ja'wil ta atojol jich c'oem awu'un te bit'il jun c'aal c'ax te wojeye. Jich nax c'oem te bit'il jun cheb nax ora ta ajc'ubale.

⁵ Ora nax ya ames bael te ants-winiquetic, jich nax c'oemic te bit'il waichejele;

⁶ jichic te bit'il ch'in wamal te ya xch'ie, ya yac' snich ta sab, pero ta xmal c'aal ya sayub soc ya xlaj.

⁷ Melel nix a, te sc'ajc'al awo'tan ya slajinotic, ya sjowtesotic.

⁸ Te jmultic soc te jboliltic jamal chican ta ilel ta atojol.

⁹ Melel, spisil te jcuxlejaltic ya xlaj ta swenta te awilimbae; te ja'wiletic cu'untic jich nax ya xc'axic te bit'il ya jic' te co'tantique.

¹⁰ Lajuneb xchanwinic (70) ja'wil te cuxlejale; te mach'atic ay yip sbaq'uetalic, ya xc'otic c'alal ta chanwinic (80) ja'wil. Pero te toybail yu'un te cuxlejal bayal c'aal, ja' nax ya yac' wocol soc ya yac' at'el. Te ja'wiletic ora ya xc'axic, ja' nix jich te jo'otique.

¹¹ ¿Mach'a ya sna'bey sba te yip te awilimbae? ¿Mach'a ya sna'bey sba te sc'ajc'al awo'tane?

¹² Ac'a jnoptic yajtayel ta lec te jujun c'aal yac ta c'axel cu'untic, swenta yu'un jich ya xc'ot ta joltic a te p'ijil c'ope.

¹³ Cajwal, sujt'an tel ta jtojoltic. ¿Jayeb xan c'aal ya xjalajat? Na'a yo'bolil jbatic te awabatotique.

¹⁴ Nojesawotic ta xc'uxul awo'tan ta jujun c'aal te c'alal ya sacub te q'uinale, jich bin nax me co'tantic ya xc'ajinotic te jayeb c'aal cuxulotique.

¹⁵ Ac'botic bayal ja'wil yutsil q'uinal caiytic, ja'uc nix pajal soc te jayeb ja'wil yacalotic ta woclajele.

¹⁶ Te at'eliletic awu'un soc te awutsilale, ac'botic quiltic te abatotic awu'un soc te patil alnich'anetique.

¹⁷ Ac'a c'otuc ta jtojoltic te yutsil yo'tan Cajwaltic, te Dios cu'untique. Staleluc ma xch'ay awu'un te cat'eltic, Cajwal; staleluc ma xch'ay awu'un, Cajwal.