Salmos 89 - Bible in Tzeltal de Oxchuc y Tenejapa

Trato yu'un Dios ta stojol David

¹ Cajwal, spisil me ora ya cal ta c'ayoj te mero buen lec awo'tan te ja'ate; spisil me ora ya jc'ajintay te jun awo'tane.

² Ya me jpuc ta alel te sbajt'el q'uinal ay te xc'uxul awo'tane; soc te jun awo'tan te ma'yuc bi ora ya xyanaj, jich te bit'il ma xyanaj te ch'ulchane.

³ La apas trato ta stojol te David, jc'axel jich la awalbey te tsabil abat awu'une:

⁴ “Spisil me ora ya cac'bat ajelolin ta muc' ajwalil te patil alnich'anetic awu'une”, la awut.

⁵ Cajwal cu'un, spisil te bitic cuxajtic ta ch'ulchane ya yalbat yutsil ac'oplal te bit'il ma xyanaj awo'tan, soc ya yalbat yutsil sc'oplal te jchajp at'eliletic awu'une.

⁶ Cajwal, ma'yuc mach'a ay ta ch'ulchan te pajalat soque. Te mach'a ay yu'elique ma spajat te ja'ate.

⁷ Mero muc' Diosat, ayat ta xi'el; joytaybilat yu'un spisil bitic cuxajtic ta ch'ulchan.

⁸ Cajwal, Dios cu'un te Spisil ya xju' awu'une, ja'at nax ay awu'el soc ac'u'inej te bila smelelil; ma'yuc mach'a yan jich te bit'il ja'ate.

⁹ Ja'at ya apas ta mandal te mar jajch'em sc'ajc'al yo'tan; soc ya alamantesbey yip teme jajch' ta bule.

¹⁰ La anet' te chambalam te mero xiweltic sba smuc'ul ta ja', jich bit'il winic te lajeme; ta swenta yip ac'ab atuquel, la apuc bael te acontrotaque.

¹¹ Te ch'ulchan soc te balumilal awu'un atuquel; ja'at la apas soc spisil te bitic ay tey a.

¹² Ja'at la apas te bitic ay ta norte soc te bitic ay ta sur; bin nax yo'tanic ya sc'ajintayat te wits Tabor soc te wits Hermón.

¹³ Te ac'ab spisil ya xju' yu'un; te swa'el ac'ab mero tulan soc yaiyoj tsalaw.

¹⁴ Te amuc'ul nactijib ja' yiptajib te toj-o'tanil soc te bila stojil ya achajbane; ta swenta spisil te bila ya apase, ya xchicnaj a te sc'uxul awo'tan soc te jun awo'tan.

¹⁵ Cajwal cu'un, bayal yutsil te lum te bin nax yo'tan ya sna' yalel yutsil ac'oplal, soc te chican q'uinal ya xbeen yu'un te saquil q'uinal awu'une.

¹⁶ Ta awenta atuquel te spisil ora bayal yutsil q'uinal ya yaiy; bin nax yo'tan yu'un te toj-o'tanil awu'une.

¹⁷ Ta mero melel ja'at te yipinejat te lum soc te yich'ojbat te at'ujbilale; te quiptic ya x'esmaj ta swenta te yutsil awo'tane.

¹⁸ Te Cajwaltique, ja' jmajq'uiltic stuquel; te muc' ajwalil cu'untic ja' te Ch'ul Dios yu'un te Israel.

¹⁹ Ta namey tel c'opojat soc ay bila la awac'bey yil ta sitic, jich la awalbey te abatetic awu'un te mach'atic jun yo'tanic ta atojole: “La jtsaix jtul ta lum cu'un, jtul te ay yip yo'tan soc te ma xiwe, toyol la caq'uix soc coltaybil cu'un.

²⁰ La jtaix ta leel te cabat David; la cac'bey ch'ul aceite ta sjol jich la jtsaix ta muc' ajwalil.

²¹ Ma'yuc bi ora ya xpasot falta te coltayel cu'un ta stojole; ya me cac'bey yip ta swenta cu'el.

²² Ma me ba ya xmacot yu'un te scontrotac; soc ma xtsalot yu'un te mach'atic amen yo'tanique.

²³ Ya me jlajinbey te scontrotaque, ya me yil te ya cac' ch'ayuc bael; ya me jwuy te mach'atic ay slab yo'tanic yu'une.

²⁴ Ya me smuc'ulin yo'tan te xc'uxul co'tan soc te bit'il jun co'tan ta stojole; jo'on me ta jwenta te ya x'esmaj xan te yipe.

²⁵ Jc'axel me ya cac'bey swentain soc yip spamal te lumq'uinal, ja' te jajch'em ta Mar Mediterráneo c'alal ta muc'ja' Éufrates.

²⁶ Jich me ya yalbon ta jtojol: ‘Ja'at Jtatat; ja'at Diosat cu'un, te ya acoltayon soc te ya acanantayone,’ xi' me.

²⁷ Jo'on me ya cac'bey yich' te bitic ay ta swenta yich'el te ba-nich'anile; ja' me toyol ya cac' c'otuc ta stojol yantic muc' ajwaliletic ta balumilal.

²⁸ Spisil me ora ay xc'uxul co'tan ta stojol; soc te trato jpasoj ta stojol, stalel me ay.

²⁹ Te patil alnich'anetic yu'un ja' me ya sjelolin ta muc' ajwalil ta spisil ora te jayeb c'aal lec ay te ch'ulchane.

³⁰ “Pero teme ya yijq'uitaybonic te nopjibal cu'un soc teme ma jichuc ya x'ainic te bit'il caloj mandale,

³¹ teme ma ba ya yich'bonic ta muc' te mandaliletic cu'un soc teme ma ba ya xch'uunbonic te bitic caloje,

³² ya me cac'bey majel ta wajch' c'oem swenta castigo teme la scontroinon ta scaj te sbolile.

³³ Pero ma xlaj xc'uxul co'tan ta stojol stuquel te David; stalel me jun co'tan ta stojol.

³⁴ Ma ba ya jlajinbey sc'oplal te trato cu'une; ma me xch'ay cu'un te bila caloje.

³⁵ Jun nax buelta jc'axel caloj swenta bit'il ch'ul Dioson jtuquel, ma ba ya jpas ta lot te David:

³⁶ ja' ya sjelolin ta muc' ajwalil te patil alnich'anetic yu'un ta spisil te jayeb c'aal lec ay te c'aale.

³⁷ Stalel me ay, jich te bit'il u; stalel ay te jayeb c'aal lec ay te ch'ulchane”, xaat.

³⁸ Pero la ach'ayix soc la awilayix te muc' ajwalil atsaoje; ilinatix ta stojol.

³⁹ La ajinix te trato ta stojol te abat awu'une; la ach'ojbeyix ta lum te scorona.

⁴⁰ La ajambeyix ta spisil te sjoyob ts'ajc'ule; la ac'atp'unbeyix ta jinem ts'ajq'uetic te lumetic yu'une.

⁴¹ Spisil te mach'atic ya xc'axic, ya yelc'anic bael te bila ya smulanique; te spat-xujc' ya xlabanot yu'un.

⁴² Te scontrotac la awac'beyix stoy sc'abic swenta bin nax yo'tanic te ju' yu'unic tsalawe.

⁴³ La alajinbey ye te spuñale; ma ba la awac' ta tsalaw ta guerra.

⁴⁴ La alajinbey te yutsilal; la ach'ojbeyix ta lum te smuc'ul nactijibe.

⁴⁵ La acomtesbey te xcuxlejal; bayal la awac' q'uexawuc.

⁴⁶ Cajwal cu'un, ¿jayeb xan c'aal te anac'oj abae? ¿Spisil bal ora yac ta tilel jichuc c'ajc' te awilimbae?

⁴⁷ Cajwal, na'a me te com te jcuxlejale; te mach'a pasbil awu'un, ma ba jal c'aal cuxul ta q'uinal.

⁴⁸ Ma'yuc mach'a ya xcuxin te ma'yuc bi ora ya xlaje; ma'yuc mach'a ya xju' scoltaybel sba ta sc'ab te lajele.

⁴⁹ Cajwal, ¿banti ay te xc'uxul awo'tan te ay ta namey, te jun awo'tan la awalbey ta jamal te David?

⁵⁰ Cajwal, na'a me te abat awu'un, te bayal mach'atic ya x'uts'inbot yo'tan yu'une; melel ma xch'ay ta co'tan te uts'inele.

⁵¹ Cajwal cu'un, jich ya yuts'in co'tantic te acontrotaque; jich ya yuts'inbey yo'tan ta spisil ora te mach'a tsabil awu'une.

⁵² Bayaluc me yutsil sc'oplal sbajt'el q'uinal te Cajwaltique. Jichuc.