Salmos 88 - Bible in Tzeltal de Oxchuc y Tenejapa

Cajwal ¿bi yu'un ya awilayon?

¹ Cajwal, Dios cu'un, Jcoltaywanej cu'un, c'aal ajc'ubal ya jc'anbat coltayel.

² Tsacbon jc'op te ya jc'oponate, ich'bon ta wenta te jc'ope.

³ Mero bayal te bila ma lecuc julem ta jtojole; mero nopol ayonix soc te lajele.

⁴ Ya xju' ya yajtayoniquix soc te mach'atic lajemique, melel ma'yuquix quip jilon ya caiy.

⁵ Ch'aybilonix jilel ta yolil te mach'atic lajemic; jichon te bit'il mach'a lajem ta guerra te yich'ojix muquele; soc jichon te bit'il mach'a ch'ayemix ta awo'tan, te ma ba ya yich' coltayel awu'une.

⁶ La ach'ojonix ochel ta mero sc'ubulil ch'en, ta sc'ubulil yijc'al q'uinal.

⁷ La acojt'esbonix tel ta jba te awilimba; la awaq'uix smulon coel te yip sbeel ja'etic awu'une.

⁸ La awaq'uix spijt'eson te mach'a c'ux ya caiy jba soque; jich c'oonix awu'un te bit'il mero ma xtuunonixe, jich c'oemon bit'il jchuquel te ma xju' ya scoltay sbae.

⁹ Ta scaj te bayal ya x'oc'on, yacalix ta tup'el te jsite. Cajwal, ta jujun c'aal ya jc'oponat, ya jtoy jc'ab ta atojol.

¹⁰ ¿Ya bal awac' ta ilel jchajp at'elil ta stojolic te mach'atic lajemique? ¿Ya bal xju' ya yalbat xan wocol?

¹¹ ¿Ay bal ya x'albot sc'oplal ta muquenal te bila smelelil awu'un? ¿Ay bal ya x'albot sc'oplal te xc'uxul awo'tan ta yawil lajele?

¹² Tey ta yaxinal lajel te banti spisil ya xch'ay ta co'tantique, ¿ay bal mach'a ya xjul ta yo'tan te bila stojil awu'une? ¿Ay laj bal mach'a ya xjul ta yo'tan te jchajp at'eliletic awu'une?

¹³ Pero te jo'on, Cajwal, ya jc'oponat; ta buen sab ya calbat wocol ta atojol.

¹⁴ ¿Bi yu'un ya awilayon, Cajwal? ¿Bi yu'un ya anac' aba ta jtojol?

¹⁵ C'alal to ta jqueremil, ayon tel ta woclajel soc ayon ta sti'il te lajele. C'axem cu'un bitic mero xiweltic sba te ja'at la awac'bon tel ta jtojole; ma xcujch'ix cu'un ya caiy.

¹⁶ Te sc'ajc'al awo'tan, te mero xiweltic sba, c'axem ta jba spisil, la yu'uninonix.

¹⁷ Mero ya sjoytayon ta spisil ora, jich bit'il te snojel ja'e.

¹⁸ La awaq'uix c'ubuc ta jtojol te mach'atic c'ux ya caiy jba soque, ja' te mach'atic jun co'tan jba soque; yo'tic ja' xanix c'ux ya caiy jba soc c'oem te yijc'al q'uinale.