Salmos 87 - Bible in Tzeltal de Oxchuc y Tenejapa

Yutsil sc'oplal lum yu'un Dios

¹ Te yiptajib te lum yu'un Dios ay ta sba te ch'ul witsetique.

² Te Cajwaltic c'ux ta yo'tan te ti'nailetic yu'un Sión; c'axem jich c'ux ta yo'tan a te bit'il spisil nanatic yu'un Jacob.

³ Lum yu'un Dios, buen t'ujbil yutsil te bila albil ta atojol te ja'ate:

⁴ “Te jayeb lumetic te ya sna'bonic jba, ya xju' ya calbey sbiilic: te Egipto soc Babilonia, Filistea, Tiro soc Etiopía; ta spisilic ainic c'oem ta awolil ja'at”, xi' me.

⁵ Te lum Sión jich me ya x'albot sc'oplal: “Ja' in to, soc ja' me to, ainemic ta awolil stuquel”, xiic me. Ja' nix te mach'a mero Toyol te jich jc'axel yaloj uuque.

⁶ Te Cajwaltic ya sts'ibuy ta libro te banti ay sbiilic te lumetique: “Tey ayinemic a”, xi' me.

⁷ Te mach'atic ya yaiyic c'ayoj soc mach'atic ya yaiyic ajc'ot ta swenta yutsil yo'tanic ta stojol Dios, jich ya yalic: “Te jna ay ta awolil atuquel”, xiic me.