Salmos 86 - Bible in Tzeltal de Oxchuc y Tenejapa

Ja'at nax atuquel Diosat

¹ Cajwal, ac'a tel achiquin, aiybon me jc'op, yu'un mero ayon ta mel-o'tan soc mero me'baon.

² Canantayawon, melel jun co'tan ta atojol. Ja'at Diosat cu'un; coltayawon te awabaton te ja'at smuc'ulinejat co'tane.

³ Cajwal, na'bon yo'bolil jba, melel ja'at te ya calbat wocol spisil ora.

⁴ Cajwal, ac'bon yutsil co'tan te awabatone, melel ja'at ya calbat wocol ta atojol.

⁵ Melel ja'at Cajwal, buen lec awo'tan soc jpas-perdonat atuquel; mero jc'uxtaywanejat yu'unic te mach'atic ya yalbat wocole.

⁶ Cajwal, aiybon me jc'op te ya calbat wocol; ich'bon ta wenta te jc'ope.

⁷ Te c'alal c'ux obol jba, ya jc'oponat, jich ya acoltayon.

⁸ Cajwal, ma'yuc yan dios jich te bit'il ja'ate; ma'yuc bi yan ya spaj te awat'ele.

⁹ Cajwal, ja'at la apas spisil te nacionetic; ya me xtalic ta atojol swenta yu'un ya xch'uunat soc swenta yu'un ya yalbat yutsil ac'oplal.

¹⁰ Melel ja'at nax atuquel Diosat; ja'at muc'at, soc ya apas jchajp at'eliletic.

¹¹ Cajwal cu'un, ac'bon quil te be awu'une, swenta yu'un jun me co'tan ya jt'un. Ac'bon quich'at ta muc' soc te co'tane.

¹² Cajwal, Dios cu'un, ya me calbat yutsil ac'oplal ta spisil co'tan; soc ya me jtoyesbat yutsilal ac'oplal ta spisil ora.

¹³ Mero muc' te xc'uxul awo'tan ta jtojole; melel la awac'on ta libre, ma ba la awac'on ochel ta muquenal.

¹⁴ Dios cu'un, te mach'atic jbol-o'tanetic soc j'uts'inwanejetic te ma ba xi'ojate ya scontroinonic spisil ora soc ya sc'an ya smilonic.

¹⁵ Pero ja'at Cajwal, Diosat te ya xtal xc'uxul awo'tan ta jtojol, te ya ana'bon yo'bolil jba, soc te ma orauc ya x'ilinat ta jtojol. Bayal xc'uxul awo'tan, soc muc' te smelelil ac'ope.

¹⁶ Ila awilon, na'bon yo'bolil jba. Coltayawon te awabatone, soc ac'bon te awipe.

¹⁷ Ac'bon quil prueba te yutsil awo'tan ta jtojole, swenta yu'un ya me xq'uexawic te c'alal ya yilic te mach'atic xut'et slab yo'tanic cu'une. Ja'at Cajwal, ya awac'bon jcoltayel, soc ya awac'bon smuc'ul co'tan.