Salmos 85 - Bible in Tzeltal de Oxchuc y Tenejapa

Coltayawotic yan buelta.

¹ Cajwal, mero buen lec awo'tan ta stojol te lumq'uinal awu'une; la awac' sujt'uc xan tel te yutsil yo'tan Jacob.

² La apasbeyix perdón te sbolil yo'tan te lum awu'un; la apasbeyix perdón ta spisil te smulique.

³ Jc'axel la awaq'uix lamajuc te awilimba soc te sc'ajc'al awo'tane.

⁴ Dios cu'untic soc jcoltaywanejat cu'untic, coltayawotic xan yo'tic, ma me spisiluc ora ilinemat ta jtojoltic.

⁵ ¿O ya to bal xnajt'aj xan bael te awilimba ta jtojoltique?

⁶ ¿Ma bal yacuc awac' xan jcuxlejaltic, swenta yu'un jich bin nax yo'tan ta atojol a te lum awu'une?

⁷ Cajwal, ac'a quiltic te xc'uxul awo'tane, coltayawotic.

⁸ Ya me caiytic te bi ya yal te Cajwaltique; melel ya me yalbey sc'oplal lamal q'uinal ta stojol te lum yu'une, ja' me te mach'a jun yo'tanic ta stojol, swenta yu'un ma ba ya xcha'pasic xan bitic swenta jowejel.

⁹ Ta mero melel, nopol ay te Diose, ya me scoltay te mach'atic ya x'ich'ot ta muc' yu'une; te yutsilal ya me xchicnaj xan ta jlumaltic.

¹⁰ Ya me xc'ot yorail te ya sta sba soc te c'uxul-o'tanil te bila smelelil, te lamal-o'tanil soc te toj-o'tanile, jich c'oem te ya spet sbaique.

¹¹ Ya xloc' tel ta lumq'uinal c'oem te bila smelelil, soc ya yil coel tel ta ch'ulchan te toj-o'tanile.

¹² Ja' me te Cajwaltic te ya yac' tel te ja'ale, swenta ay bi ya sitin ta lumq'uinal cu'untic.

¹³ Te toj-o'tanil ya me xneelaj bael ta stojol, ya me xchajbanbey sbe te Cajwaltique.