Salmos 83 - Bible in Tzeltal de Oxchuc y Tenejapa

Sc'anel coltayel ta sc'ab scontrotac Israel

¹ Dios cu'un, ma me ch'abaluc q'uinal awu'un. Ma me ja'uc te ma x'atij abae, soc ma me ja'uc te ma xc'opojate.

² Ila awil te acontrotac, ja'ic te xut'et slab yo'tanic awu'une, ya sjachic c'op soc ya stoy sbaic ta atojol.

³ Soc sp'ijil yo'tanic la xchapix sc'opic ta swenta scontroinel te lum awu'une, ja' te mach'atic canantaybil awu'une.

⁴ Snopojiquix te ya xtal slajinotic, swenta yu'un jc'axel ya xch'ay ta q'uinal a te nacione, soc swenta yu'un ma'yuquix bi ora ya xchicnaj ta alel te sbiil Israel.

⁵ Ay bila la xchapiquix ta swenta acontroinel, la spajix sc'opic ta jun nax te winiquetique:

⁶ ta chajbalchajp te Edom soc Ismael, te patil alnich'anetic yu'un Agar soc Moab,

⁷ Gebal, Amón soc Amalec, filisteoetic, soc te mach'atic nainemic ta lum Tiro.

⁸ Soc nix te asiriaetic la syomix sbaic soc, ja' mero yip sc'abic te patil alnich'anetic yu'un Lot.

⁹ Jich xapasbey ta stojolic te bit'il la apasbey te Madián, jich bit'il la apasbey Sísara, jich bit'il la apasbey Jabín ta beja' Cisón

¹⁰ te la yich'ic milel ta Endor, te c'atp'ujic ta c'a'em lum ta q'uinal te sbaq'uetalique.

¹¹ Jich xapasbey te tulan winiquetic yu'un te bit'il la apasbey te Oreb soc Zeeb; jich xapasbey ta spisil soc jwentainwanejetic yu'unic te bit'il la apasbey Zeba soc Zalmuna,

¹² te la sc'an yu'uninbeyic te aquiltic yu'un te Diose.

¹³ Dios cu'un, jich xawac' baletel te bit'il taquin ch'ix, jichuc ac'a c'otuc te bit'il taquin yabenal te' ya xlicot bael ta iq'ue.

¹⁴ Soc jich te bit'il c'ajc' ya xchic' te q'uinal, jich te bit'il c'ajc' ya slajin te te'etic,

¹⁵ jich me x'anuts soc te chawuquil ic' awu'un, xiwtesa soc te sutu-iq'ue.

¹⁶ Ac'a ta q'uexlal, Cajwal, swenta yu'un jich ya xtal ta atojol a.

¹⁷ Ac'a yich'ic q'uexlaltesel sbajt'el q'uinal; ac'a yich'ic q'uexlaltesel soc ac'a lajuquic.

¹⁸ Ac'a sna'ic te ja'at nax Ajwalilat, te ja'at nax te mero Toyolat, te atuquel ay ta awenta spamal te q'uinale.