Salmos 82 - Bible in Tzeltal de Oxchuc y Tenejapa

Ja' mero muc'ul jchajbanwanej te Diose

¹ Te Dios ay ta yolil te ch'ul abatetic ta ch'ulchan, ja' ya yaiy chajbanwanej stuquel.

² Jich ya yal: “¿Jayeb to ora te ya apasic te lotil chajbanwanej te ja'exe, soc te ja' ya acoltayic ta c'op te mach'atic amen yo'tanique?

³ Stojil xachajbanic te mach'atic ma'yuc yipic, soc stojil xachajbanic te me'baetic soc te me'ba alaletique; te mach'atic ma'yuc bi ay yu'unique.

⁴ Ac'a ta libre te mach'atic ay yo'bolil sbaic; coltayaic te mach'atic me'baetique; coltayaic loq'uel ta sc'abic te mach'atic amen yo'tanique.

⁵ “Pero te ja'exe ma x'ana'ic, ma xc'ot ta awo'tanic; melel yacalex ta beel ta ijc' q'uinal. Ac'a nijc'uc te yiptajib te lumq'uinale.

⁶ Jo'on caloj te diosex te ja'exe, te apisilic yal-snich'anex te mach'a mero Toyole.

⁷ Pero jich ni me ya xlajex te bit'il ya xlajic te ants-winiquetique; jich ya xyalex te bit'il yantic mach'atic jtoyba jchajbanwanejetique”, xi' te Diose.

⁸ Dios cu'un, chajbana aba ta xchajbanel te mach'atic ayic ta q'uinale, melel ja'at yajwalat ta spisil te nacionetique.