Salmos 81 - Bible in Tzeltal de Oxchuc y Tenejapa

Lec yo'tan Dios, ma lecuc yo'tan Israel

¹ Binuc nax me awo'tanic xac'ajintayic te Diose, melel ja' me ya yac' quiptic stuquel; albeyaic yutsil sc'oplal ta aw ta swenta yutsil q'uinal ya awaiyic ta stojol te Dios yu'un Jacob.

² C'ajintayaic soc pandero, soc te yutsil sc'op arpa, soc te yan músicae.

³ Oq'uesinaic oq'ues te c'alal ya sta yorail te yach'il u, soc nix te c'alal ya sta yorail ya sep sba, te ja' sc'aalelal te mero muc'ul q'uin cu'untique.

⁴ Melel ja' te mandal te la yac'bey Israel te Dios yu'un Jacob;

⁵ ja' mandal ac'bot José te bi ora Dios la yac' ta ilel yu'el ta Egipto. La caiy c'op te ma ba jna'oj mach'a sc'op, jich la yal:

⁶ “La jcojt'esbatix te awijc'ats acuchoje; la cac'atix ta libre yu'un te tulan at'ele.

⁷ Te c'alal ayat ta buen woclajel ae, la awic'on, jich la jcoltayat; la jac'bat ac'op c'alal ta tocal te banti yac ta t'omel chawuc; la jpasat ta prueba ta sts'eel te ja'etic yu'un Meriba.

⁸ Lum cu'un, aiybon awaiy te bila ya calbate; te yacuc ach'uunbon jc'op, Israel.

⁹ Ma me x'adiosinbeyic te diosetic yu'un jyanlumetic; ma me xach'uunic diosetic teme ma ja'uc ya awil te Dios awu'une.

¹⁰ Jo'on Ajwalilon, te Dioson awu'une, te la jloq'uesat tel ta sq'uinal Egipto; jama awe, jo'on me ya jnojesbat.

¹¹ “Pero te lum cu'une ma la sc'an la yaiybon te jc'ope; te Israel ma ba la sc'an xch'uunbon jc'op.

¹² Ja' yu'un la cac' te ja' nix la spasic te bila swenta toybail; soc jich ainic ta spisil ora te bit'il la smulan te yo'tanique.

¹³ Te lajuc yaiybon jc'op te lum cu'une, te lajuc st'unbon te beetic cu'un te Israel,

¹⁴ jmujts' nax ta sitil la cac' pejc'ajuc te scontrotac soc la cac'beyix castigo te jichuque”, xi'.

¹⁵ Te mach'atic ay slab yo'tanic ta stojol Cajwaltic ya me xyalic jilel ta lum stuquelic, soc jc'axel me chapal ya xjil te ya xba yich'ic castigo.

¹⁶ Te Dios ya me yac'bey swe'el te lum yu'une: ja' me ya yac'bey swe'elinic te mero lequil trigo, soc ja' me ya yac'bey snojes xch'ujt'ic a te xchabul ajachab.