Salmos 80 - Bible in Tzeltal de Oxchuc y Tenejapa

Lecucotic me ta asit

¹ Jcanan-chijat ta stojol Israel, te ya awic' ta beel te José, jich ya awic' ta beel te bit'il jtsojp chijetique, ja'at te ay amuc'ul nactijib ta sba querubinetic, aiybon awaiy jc'op. Lecuc me ta asit te Efraín,

² te Benjamín soc te Manasés. Cuxa awo'tan, la', coltayawotic ta awu'el.

³ Dios cu'un, jich nix xawac'otic te bit'il ayotic ta neelal to. Lecucotic me ta asit, jich me ya xcolotic.

⁴ Cajwal, Diosat te Spisil ya xju' awu'une, ¿jayeb xan c'aal te ilinem awo'tan te ma ba ya atsacbey sc'op te lum awu'une?

⁵ Ja' la awac' jwe'elintic c'oem te ya'lel jsitique; ja' cuch'baltic c'oem awu'un te ya'lel jsitique.

⁶ La ac'atp'unotiquix ta jlabanel yu'un te mach'atic ayic ta sti'il te jq'uinaltique; soc nix te jcontrotic ya stse'luyotic.

⁷ Diosat cu'un, te Spisil ya xju' awu'une, jich nix xawac'otic te bit'il ayotic ta neelal to. Lecucotic me ta asit, jich me ya xcolotic.

⁸ Ta Egipto la aloq'ues tel jun ts'usubil; la ach'oj loq'uel te mach'atic ma ba xch'uunejate, ja' la ats'un tey a te ts'usubile.

⁹ La awaq'uentaybey te sq'uinalile, c'ub yisim tey a, jich noj yu'un spamal te q'uinale.

¹⁰ La smuc ta yaxinal te witsetic soc la smuc ta sc'abc'ab te buen toyol te'etique.

¹¹ La spuc bael sba c'alal ta mar te sc'abc'abe, c'ot c'alal ta muc'ja' Éufrates te spule.

¹² ¿Bi yu'un la awac' jamuc te scorralile, te jich ju' yu'unic stulel sit te mach'atic ya xbeenic ta be?

¹³ Te ja'mal chitametic la stuch'ic; bic'ot yu'un te ja'mal chambalametique.

¹⁴ Diosat te Spisil ya xju' awu'une, sujt'an tel, wocoluc a; ila ta lec c'alal ta ch'ulchan, na'beya yo'bolil sba te ts'usubile.

¹⁵ Ja' te ts'usubil te ja'at nix ats'unoje; ja' te spul te ja'at nix la awac' ch'iuc ta lumq'uinale.

¹⁶ Lajina soc sc'ajc'al awo'tan te mach'atic ya set'ic soc ya xchiq'uique;

¹⁷ pero coltaya te winic tsabil awu'une, te spul te winic te ja'at la awac' ipajuque.

¹⁸ Ma'yuquix bi ora ya jpit jbatic ta atojol. Ac'botic jcuxlejaltic, jich me ja'at nax ya jc'oponticat.

¹⁹ Cajwal, Dios cu'un te Spisil ya xju' awu'une, jich nix xawac'otic te bit'il ayotic ta neelal to. Lecucotic me ta asit, jich me ya xcolotic.