Salmos 8 - Bible in Tzeltal de Oxchuc y Tenejapa

Yutsilal Dios soc yutsil sc'oplal ants-winiquetic

¹ Ja'at Diosat, Ajwalilat atuquel, te abiil, muc' ta alel ta spamal balumilal. Te awutsilal, pujq'uem bael sc'oplal ta sjelawel ch'ulchan.

² Ta swenta yutsil ac'oplal ay ta alel yu'un alaletic, ja' te mach'atic ya to xchu'unique, la apas anjibal ta scaj acontrotac, swenta yu'un ya xjin ta jyalel te jtoybaetic soc te jcontroinwanejetique.

³ C'alal ya quil te ch'ulchan te ja'at nix la apas atuquele, soc te u soc te eq'uetique,

⁴ ya cal ta co'tan: “¿Bi swentailuc awu'un te ants-winique? ¿Bi swentailuc awu'un te mach'a ch'ich'-baq'uet naxe? ¿Bi yu'un te ay ta na'el awu'un soc te ay sc'oplal ta awo'tane?”

⁵ Melel jteb ma pajaluc la apas jich bit'il te jun dios, la awac'bey yutsilal soc ich'el ta muc'.

⁶ La awac'bey swentain te bila apasoj ta ac'ab, la awac' toyuc sc'oplal yu'un ta spisil:

⁷ ta bay chijetic soc wacaxetic, ja'mal chambalametic,

⁸ soc mutetic ya xwilic ta toyol, chayetic te ayic ta ja', soc spisil bitic ayic ta mar.

⁹ Ja'at Diosat, Ajwalilat atuquel, te abiile muc' ta alel ta spamal balumilal.