Salmos 79 - Bible in Tzeltal de Oxchuc y Tenejapa

Mel-o'tan yu'un laj Jerusalén

¹ Dios cu'un, te mach'atic ma ba xch'uunejat la yochintaybatix te aq'uinale. La sboltesbeyiquix sc'oplal te ch'ul templo awu'un, soc la sjiniquix jilel te Jerusalén.

² Bayuc nax chawajtic la yijq'uitaybey sbaq'uetalic te abatetic awu'une, ja' te mach'atic jun yo'tanic ta atojole, swenta yu'un ya xtuun yu'un swe'el xulemetic soc yantic ja'mal chambalametic.

³ Jich ta spamal Jerusalén la smalbeyic xch'ich'el te bit'il ya xmal te ja'e, ma'yuc mach'a mucotic yu'un.

⁴ Te mach'atic ayic ta sti'il te jq'uinaltic ya slabanotic yu'un; soc ya stse'luyotic te mach'atic ayic ta sjoyobale.

⁵ Cajwal, ¿jayeb xan me ora te ilinemate? ¿Spisil bal ora te yac ta tilel jichuc c'ajc' te awilimbae?

⁶ Ja' xaloq'ues slab awo'tan a te lumetic ma ba xch'uunejat, te ma sna'bat abae, soc te ma ba ya yalbat wocol ta atojole.

⁷ Melel ja'ic la sbiq'uic c'oem te Jacob; jc'axel la sjinic te jlum-jq'uinaltique.

⁸ Ma xawac' jtojbeytic te sbolilic te antiguo jme'-jtatique; ac'a taluquix yorail te c'uxtayel awu'un, yu'un mero c'ax bayal jwocoltic.

⁹ Dios cu'untic, jcoltaywanej cu'untic, coltayawotic, ac'awotic ta libre; pasbotic perdón yu'un te jmultic swenta yutsil ac'oplal.

¹⁰ Ma me xyalic te mach'atic ma ba xch'uunejate: “¿Banti ay te Dios yu'unique?” te xiique. Ac'a quiltic bit'il ya asujt'esbey spacol te la yich'ic milel te abatetic awu'une; soc yacuc yilic uuc te mach'atic ma ba xch'uunejate.

¹¹ Ich'beya ta wenta sc'opic te mach'atic chucajtique, soc te mach'atic ya x'och yich'ic milel; coltaya ta swenta te smuc'ul awu'ele.

¹² Dios cu'un, sujt'esbeya spacol juqueb buelta c'oem ta stojolic te mach'atic ayic ta sti'il te jq'uinaltique, ja' te uts'inwanic ta atojole.

¹³ Yan te lumotic awu'un, te chijotic yu'un te aq'uinale, ya me caltic wocol ta atojol spisil ora; soc te patil alnich'anetique ya me jc'ajintaytic yutsil ac'oplal ta swenta sbajt'el q'uinal.