Salmos 77 - Bible in Tzeltal de Oxchuc y Tenejapa

Ya xtal ta co'tan te bila spasoj te Diose

¹ Ja' ya jc'opon ta tulan te Diose, swenta yu'un jich me ya yaiy stojol.

² Te bi c'aalil ayon ta mel-o'tan, ya jle te Cajwale; ta jujun ajc'ubal spisil ora ya jtoy jc'ab ta sc'oponel. Ma'yuc banti ya jta smuc'ul co'tan ya caiy.

³ Ya me jna' te Diose, soc ya x'oc'on; te bila ya jnop ta co'tan, ya xpejc'aj co'tan yu'un.

⁴ Ja'at Cajwal, ma xawac' te jc'axel ya smuts' sba te jsite; mero cham nax ya caiy yu'un, asta ma xloc' jc'op yu'un.

⁵ Ya xtal ta co'tan te jujun c'aal soc te ja'wiletic ta namey tale;

⁶ ya jna' te ay la caiy c'ayoj ta jujun ajc'ubale. Ya jna'ulay ta co'tan, jich ya cal:

⁷ “¿Pero spisil bal ora ilinem te Cajwale? ¿Ma bal yacuc to xcha'ic'otic xan soc yutsil yo'tan?

⁸ ¿Yu'un bal lajemix te xc'uxul yo'tane? ¿Jc'axel bal lajemix sc'oplal te bila chapal yu'un ta jtojoltique?

⁹ ¿Yu'un bal ch'ayemix te yutsil yo'tan te Diose? ¿Mero c'ax ilinem bal te ma ba ya sna'ix yo'bolil jbatique?” xoon yu'un.

¹⁰ Te bi mero c'ux ya caiye, ja' te c'alal ya jna' te ma jichuquix yo'tan ta jtojol te mach'a mero Toyole.

¹¹ Ya me jna' te jchajp at'eliletic la spas te Cajwal ta yan c'aal;

¹² ya me xtal ta co'tan spisil te bitic spasoje.

¹³ Mero ch'ul Diosat atuquel lec spisil te bitic ya apase; ¿mach'a diosil jich mero muc' te bit'il ja'ate?

¹⁴ Ja'at Diosat te ya apas jchajp at'eliletique; la awac'bey yil awu'el te nacionetique.

¹⁵ Ta swenta awu'el la acoltay te lum awu'un, ja' te sts'umbal Jacob soc José.

¹⁶ Dios cu'un, c'alal la yilat te mar, jajch' ta xiwel yu'un, jajch' ta nijq'uel c'alal ta sc'ubulil.

¹⁷ Te tocaletic la yac' coel ya'lel, chicnaj sc'op chawuquetic ta ch'ulchan soc tsantsewaletic ta bayuc.

¹⁸ Chicnaj sc'op chawuquetic awu'un ta sutu-ic'; te tsantsewaletic sacub balumilal yu'un; jich uuc te lumq'uinal yuq'uilayot yu'un nijq'uel.

¹⁹ La ajam abe ta mar c'axat ta bayal ja'etic, pero ma'yuc mach'a la yilbat awacan.

²⁰ La atojtes te lum awu'un jich te bit'il chijetic, ta swenta bit'il la awabatin te Moisés soc Aarón.