Salmos 74 - Bible in Tzeltal de Oxchuc y Tenejapa

Sc'anel scoltayel lum yu'un Dios

¹ Dios cu'un, ¿bi yu'un te jc'axel apijt'esejotique? ¿Bi yu'un te tilem slab awo'tan ta stojol te chijetic awu'un ta aq'uinale?

² Na'a me te lum awu'un, ja' te manbil awu'un ta xjajch'ibal to tale, ja' te la acoltay loq'uel tel swenta yu'un awu'un ta xchajbal soc te sts'umbale; na'a me te wits Sión te banti nainate.

³ La', ila awil te bila jinemic te mero ma'yuc slajibal; melel te contro la slajin spisil te bitic ay ta ch'ul templo.

⁴ Te acontrotac x'awetic ta aw ta ch'ul templo awu'un swenta yu'un la yaiyic tsalaw; la yaq'uix banderaetic yu'unic tey a

⁵ ta smuc'ul sti' ta yochibal. Ja' pajalic soc te jch'uy-si'etic ta yolil pimil ja'maltic,

⁶ la stop'ic te bila ch'albil te pasbil ta te'e, la sbojic ta echej soc la smajic ta martillo.

⁷ La stsumbeyic sc'aal te ch'ul templo awu'une; la sboltesic, la sjimic coel c'alal ta lum.

⁸ La xchapic te la slajinbotic ta spisile; la xchiq'uic spisil te banti ya jtsob jbatic te ya jch'uunticate.

⁹ Ma ba chicaniquix te ch'ul señailetic cu'untic; ma'yuquix ni jtuluc j'alwanej yu'un Dios, soc ni yacuc jna'tic jayeb c'aal te jich aye.

¹⁰ Dios cu'un, ¿jayeb xan c'aal te jich ya yuts'in co'tantic ta c'op te controe? ¿Jayeb xan ora te ya sbolc'optayate?

¹¹ ¿Bi yu'un te anac'oj te ac'ab te bayal yipe? ¿Bi yu'un te ameyoj ac'ab ya xjilate?

¹² C'alal to ta namey tel, ja'at muc' ajwalilat cu'un; Ja'at Dios cu'un, bayal buelta la acoltayotic ta tsalaw ta banti te lumq'uinaltique.

¹³ Ja'at la ajam ta swenta awu'el te mar, la atop'bey sjol te muc'ul chambalametic te ilobtic sbaic ta mar.

¹⁴ La atenbey sjol te muc'ul xiweltic sba Leviatán, la awac'bey swe'elin jti'awal chambalametic te ayic ta jochol taquin q'uinale.

¹⁵ Ja'at la awac' t'omuc loq'uel tel sloq'uibja' soc muc'ja'etic; la awac' taquejuc te muc'ja'etic te ma xtaquej sc'oplale.

¹⁶ Ja'at awu'un te c'aaleltic, ja'at awu'un te ajc'ubale; ja'at la awac' ainuc ta yawil te ue, ja'at la awac' ainuc ta yawil te c'aale;

¹⁷ ja'at la achajban te bay c'alal ya xc'ax ta juju-jsejp te q'uinale; ja'at la apas te yorail verano, soc ja'at nix la apas te yorail invierno.

¹⁸ Na'a me jiche, Cajwal, te ya sbolc'optayat te controe; soc te ja'ic te ma sna'ic q'uinal te amen bila ya yalic ta atojole.

¹⁹ Ma me xach'ayotic ta awo'tan. Ma'yuc quiptic, jichotic bit'il puliwoc; ma me xawac'otic ta ti'el yu'un jti'awaletic.

²⁰ Ma me xach'ay ta awo'tan te bila trato apasoj; melel te q'uinal nojel ta ixta-o'tanetic c'alal mero slajibal sti'il.

²¹ Ma xawac' te ya yich'ic pejc'anel te mach'atic ayic ta uts'inele; ac'a yalbat yutsil ac'oplal te me'baetic soc te mach'atic peq'uelique.

²² Dios cu'un, jajch'an, c'opojan atuquel. Na'a me te spisil ora ya sbolc'optayat te mach'atic ma sna'ic q'uinale.

²³ Ma me xch'ay ta awo'tan te yawic te acontrotac, te awetic yu'unic te mach'atic ma x'ich'awanic ta muq'ue.