Salmos 73 - Bible in Tzeltal de Oxchuc y Tenejapa

LIBRO 3 Yutsil yo'tan Dios

¹ Mero lec yo'tan ta stojol Israel te Diose; ja' lec yo'tan ta stojolic te mach'atic pocbil yo'tanique.

² Jteb xanix ma ba yalon yaiyel; jteb xanix ma ba bilts'uj te cacane.

³ Melel xti'ton jajch'el co'tan yu'un te la quil te xquechcon ta esmajel sbiluquic te mach'atic toybaetic soc te mach'atic amen yo'tanique.

⁴ Melel ma xtal ta yo'tan stuquelic teme ya xlajic, melel buen lec ayic, ma'yuc xchamel stuquelic;

⁵ ma ba yaiyojbeyic swocolil te bi ya yac' wocol ta stojol te ants-winiquetique; soc ni ayuc bitic tulan c'oem ta swentaic te ya x'ac'bot swocolic yu'une, jich te bit'il te yantique.

⁶ Jich yu'un ja' yuanejic te toyba-o'tanil, soc ja' sc'u'inejic te uts'inwanej.

⁷ Mero jujp'enic, jchajp nax sitic yu'un sjujp'elic. Mero bayal te bila amen snopoj te yo'tanique;

⁸ ay labanwanej, ay toyba-o'tanil, soc ma xq'uexawic, Jich ya xchajban sbaic yu'un spasel te bila amen soc swenta uts'inwanej.

⁹ Amen bila ya yalic ta stojol ch'ulchan; soc stoybailic ya xbeenic ta lumq'uinal.

¹⁰ Ja' yu'un te ants-winiquetic lec sc'oplalic yu'unic, ta sc'opic ma'yuc bila amen ay ta stojolic.

¹¹ Ya sjojc'oic: “¿Yu'un bal ya sna' te Diose? ¿Yu'un bal ya sna'bey swentail te mach'a mero Toyole?” xiic.

¹² Ila awilic te mach'atic amen yo'tanique: ta spisil yutsil yo'tanic ya yac' esmajuc te sc'ulejalique.

¹³ Tojol nax te pocbil co'tan soc jc'ab, te ma ba ya jpas muliletic ae;

¹⁴ melel spisil ora ya quich' majel, soc ya quich' castigo ta jujun sacubel q'uinal.

¹⁵ Pero te jichuc la jnop ta co'tan te bit'il yo'tanic stuquelique, la jlo'lay te alnich'anetic awu'un te jichuque.

¹⁶ La jnopilay ta co'tan, pero ma ba ju' cu'un sna'el.

¹⁷ Ja' to te c'alal ochon bael ta templo yu'un te Diose, c'ot ta co'tan te banti ya xc'otic ta lajel yu'une:

¹⁸ la awaq'uix ta yawil te banti ya xju' ya xjaxp'uj yacanic, soc ya acotp'in bael ta woclajel.

¹⁹ Ta ora nax me lajem ya xjilic. Ya me xlajinotic yu'un te xiwele.

²⁰ Te ja'at Cajwal, te bi ora ya xjajch'at jich bit'il mach'a ya xjajch' ta wayel, ya me awilaybey te bila ma smeleliluc scuyoj sbaic ae.

²¹ Mero bayal bitic pich'il co'tan yu'un, ay bila la sjulbon la caiy te co'tane,

²² scaj te ma'yuc sp'ijil co'tan ta snopel ta lec. Jich ma ba la jna'bey swentail; jichon ta atojol te bit'il chambalame.

²³ Manchuc me jich ayon, pero spisil ora joinejat; la atsacon ta swa'el ac'ab.

²⁴ La atojteson ta swenta ac'op; ta slajibal ya awic'on ta atojol soc awutsilal.

²⁵ ¿Mach'a ay cu'un ta ch'ulchan? Ja'at nax atuquel. Te c'alal ja'at joinejatix ae, ma'yuc bi ya jc'anix ta balumilal.

²⁶ Te jbaq'uetal soc te co'tan ya xlaj; pero ja' quip stuquel te Diose, soc ja' cawil sbajt'el q'uinal.

²⁷ Te mach'atic ya xc'ubic ta atojol, ya me xlajic; ya me alajin te mach'atic ma junuc yo'tanic ta atojole.

²⁸ Pero te jo'on ya me xnoptsajon ta stojol Dios, melel ja' mero lec ta co'tan. Ja'at Cajwal, te Diosat cu'une, ja'at anjibalat cu'un; ya me jpuc ta alel spisil te bitic apasoje.