Salmos 72 - Bible in Tzeltal de Oxchuc y Tenejapa

C'oponbot Dios muc' ajwalil

¹ Dios cu'un, ac'beya ta yo'tan te muc' ajwalil te bila mero stojil soc te bila yich'oj swentail ta leque,

² swenta yu'un yich'oj me swentail ta lec soc mero stojil me ya swentainbat te lum awu'un soc te me'baetic awu'une.

³ Te witsetic ac'a yac'beyic lamal q'uinal yaiy te lum; te tseletic ac'a yac'beyic spas te bitic yich'oj swentail ta pasele.

⁴ Te muc' ajwalil ac'a yac'bey bila mero stojil ta swenta te me'baetique. Ac'a scoltaybey te yal-snich'nab te mach'atic ma'yuc bila x'ain yu'unique; yan te jmozoinwanejetique ac'a yich'ic lajinel jilel stuquelic.

⁵ Ac'a taluc xiwel ta yo'tan ta atojol spisil ora te muc' ajwalile te jayeb xan c'aal ya xjalaj te c'aale soc te ue.

⁶ Jich ac'a c'otuc te bit'il ja'al te ya yajts'es te lumq'uinal soc jich ac'a c'otuc te bit'il ts'ujul te ya yajts'es te aquiltique.

⁷ Ac'a esmajuc lamal q'uinal soc te bitic yich'oj swentail ta lec ta pasele te jayeb c'aal ochem ta ajwalil ja' to teme laj te ue.

⁸ Ac'a swentain jajch'el ta sti'il mar c'alal ta yan sti'il, soc ta muc'ja' Éufrates c'alal ta slajibal sti'il balumilal.

⁹ Ac'a yac' sbaic ta sc'ab te scontrotac nainemic ta muc'ul jochol taquin q'uinal, soc ac'a spejc'an sbaic ta stojol stuquel.

¹⁰ Ac'a yich'ic tel majt'aniletic te muc' ajwaliletic yu'un Tarsis, soc yu'un te q'uinaletic joytaybilic ta ja', soc nix te muc' ajwaliletic yu'un Sabá soc Seba, soc ac'a stoj spatanic ta stojol te muc' ajwalile.

¹¹ Ac'a tal squejan sbaic ta stojol spisil te muc' ajwaliletic. Ac'a yac' sbaic ta abatinel yu'un spisil te nacionetic.

¹² Melel ja' me ya scoltay te me'ba te ya yal wocol soc te mach'a ma'yuc bi xtuun yu'un te ma'yuc mach'a xcoltayot yu'une.

¹³ Ya me sna'bey yo'bolil sbaic te mach'atic pejc'ajtic; soc ya me scoltaybey xcuxlejalic te mach'atic me'baetique.

¹⁴ Ya scoltay ta woclajel; soc ma me xyac' c'otuc ta swentaic te uts'inele. Melel mero bayal sc'oplal ta yo'tan te xcuxlejalique.

¹⁵ ¡Viva muc' ajwalil! Ac'a yich' ac'beyel te oro yu'un Sabá. Ac'a yich' c'oponbeyel Dios spisil ora. Ac'a yich' bendición spisil ora.

¹⁶ Ayuc me bayal trigo ta lumq'uinal soc ac'a me esmajuc ta baba wits. Ac'a loc'uc sit jich te bit'il ta Líbano; ac'a loc'uc bayal sit jichuc ja'maltic ta lumq'uinal.

¹⁷ Te sbiil te muc' ajwalil sbajt'eluc me q'uinal ay; jich ac'a jalajuc sc'oplal te bit'il ya xjalaj te c'aale. Ac'a c'otuc bendición ta stojolic spisil te nacionetic ta balumilal ta swenta stuquel. Ac'a me yalbeyic yutsilal spisil te nacionetic.

¹⁸ Bayal me yutsil te Diose, ja' te Cajwaltique, ja' te Dios yu'un Israele, te ja' nax stuquel te muq'uic te bila ya spase.

¹⁹ Bayal me yutsil te Dios te ay yip yu'el xojobil sbajt'el q'uinal te sbiile. Ac'a nojuc ta yip yu'el xojobil spamal te lumq'uinale. Jich ac'a c'otuc ta pasel.

²⁰ Li' laj yo'tan ta sc'oponel Dios te David te snich'an Isaí.