Salmos 71 - Bible in Tzeltal de Oxchuc y Tenejapa

La sc'opon Dios jtul mamal

¹ Cajwal, ya jle canantayel ta atojol; ma me ayuc bi ora ya jta q'uexlal ta atojol.

² Ac'awon ta libre, coltayawon, melel toj awo'tan te ja'ate. Aiybon a te jc'ope, la', coltayawon.

³ Ja'ucat me te muc'ul ton te anjibalat cu'un; ja'ucat me te tulan ts'ajc'at te banti ya x'anon soc te banti ya xcolone. Melel ja'at muc'ul ton soc tulan ts'ajc'at cu'un.

⁴ Dios cu'un, coltayawon ta sc'ab te mach'atic amen yo'tanic; coltayawon ta sc'ab te jch'ay-mandal soc te j'uts'inwaneje.

⁵ Ja'at Cajwal yipat co'tan soc smuc'ulat co'tan c'alal to ta jqueremil.

⁶ Soc te c'alal ayon to ta xch'ujt' jme', la quich'ix quip ta atojol a; ja'at la awac' ayinucon. Spisil me ora ya calbat yutsil ac'oplal.

⁷ Tsobol mach'atic xcham nax la yaiyic cu'un, pero ja'at anjibalat cu'un.

⁸ Ta sjunal c'aal nojel que yu'un te yutsil te yip yu'el axojobile.

⁹ Ma me x'awilayon te bit'il mamalonixe; ma me xapijt'eson te bit'il ma'yuquix quipe.

¹⁰ Te jcontrotac, ja' te mach'atic ya sc'an ya smilonique, la syomix sbaic, la xchap sc'opic ta swenta jcontroinel.

¹¹ Jich la yalic ta jtojol: “Nutsa, tsacaic, melel pijt'esotix yu'un Dios, ma'yuc mach'a ya xcoltayotix yu'un”, xiic.

¹² Dios cu'un, ma me xc'ubat bael ta jtojol; la' me, coltayawon ta ora.

¹³ Ac'a staic q'uexlal soc ac'a yich'ic lajinel te scontro te jcuxlejale; ac'a staic bayal q'uexlal te mach'atic yo'tanuc ya yilbonic jwocole.

¹⁴ Pero te jo'on, spisil me ora smuc'ulat co'tan; soc ya me calbat xan bayal yutsil ac'oplal.

¹⁵ Ta sjunal me c'aal ya cal te ja'at jcoltaywanejat, soc te ja' apasoj ta jtojoltic te bila stojile. Ja' te ma mero xju' cu'un sna'el bit'il aye.

¹⁶ Ya me cal te bitic muq'uic apasoj, Cajwal; ya me cal ta tulan te ja'at nax atuquel te toj awo'tane.

¹⁷ Dios cu'un, ta jqueremil to awac'ojbon jnop, c'alal ora yacon ta yalel te smuc'ul te awat'ele.

¹⁸ Dios cu'un, ma me xapijt'eson, manchuc me mamalonix soc te saquix jole; ma me xapijt'eson, melel ya to me calbey yaiyic te smuc'ul awu'el te mach'atic ayic ta balumilal soc te mach'atic ya to xc'axic ta balumilale.

¹⁹ Dios cu'un, c'oem c'alal ta ch'ulchan te toj-o'tanil awu'une, mero muq'uic te bitic apasoje; ma'yuc mach'a yan jich te bit'il ja'ate.

²⁰ Manchuc me awac'ojbon c'axuc cu'un bayal bitic c'ux obol jba yu'un soc bitic la yac'bon bayal jwocol, pero ya me awac' xan yach'il jcuxlejal. Ya me acha'jachon xan tel ta sc'ubulil lumq'uinal;

²¹ ya me awac' xan muc'ubuc jc'oplal; soc ya me acha'muc'tesbon xan q'uinal caiy.

²² Yan te jo'one, ya me jc'ajintay c'ayojetic ta yalel awutsilal soc arpa soc yantic músicaetic; ja' me ya cal te bit'il jun awo'tan spisil ora ta jtojol, Dios cu'un te ja'at te Ch'ul Diosat yu'un Israel.

²³ Bayal me yutsil co'tan ya jc'ajintayat, soc ta spisil te jcuxlejal te ja'at la acoltaybone.

²⁴ Soc nix te que, spisil me ora ya yal te toj awo'tane; melel te mach'atic yo'tanuc ya yilbonic jwocol, potsbotic jilel yelawic yu'un q'uexlal.