Salmos 7 - Bible in Tzeltal de Oxchuc y Tenejapa

Te Cajwaltique toj ya xchajbanwan

^1-2 Cajwal, Dios cu'un, ya me jleat yu'un ya acanantayon; coltayawon, ma me x'ochon ta sc'abic te j'uts'inwanejetique. Ma me xawac'on ta sc'abic, melel jichic yilel te bit'il león-chojetic; teme repente ya st'ujt'anonic ta ti'el, teme ma'yuc mach'a ya scoltayone.

³ Cajwal, Dios cu'un, ¿bi swentail te jich c'ot ta jwentae? ¿Yu'un bal ay bila jpasoj te ma lecuque?

⁴ ¿Yu'un bal jpasoj te bila amen ta stojol te mach'a lec bila spasojbone? ¿Yu'un bal yacon ta sleel yuts'inel te jcontroe?

⁵ Teme jich yacon ta spasele, ac'a snutson te jcontroe; ac'a stsacon, ac'a sbalch'unon ta teq'uel ta milel, anima ac'a jilucon ta lum yu'un.

⁶ ¡Jajch'an Cajwal, ac'a tiluc awilimba! Nujp'usitaya aba soc yilimba te jcontrotaque. Te ja'ate chapal awu'un te ya awaiy chajbanwaneje, ja'at xacoltayon.

⁷ Te ja'ate, tsoba me tal spisil te nacionetique, ac'a sjoytayat muc' xawac' te mandaltesel awu'un ta stojolic.

⁸ Cajwal, ja'at ya awalbey teme lec yat'elic spisil ta jchajp ants-winiquetic: albon bi yilel cat'el jpasoj soc te yutsil co'tane, albon bi yilel cat'el te ma'yuc bila amen jpasoje.

⁹ Dios, te toj awo'tane, ja'at ya ana' te bitic ya snop te o'tanile soc te bitic ya yal te o'tanil c'alal ta yutil. Lajinbeya sc'oplal ta jc'axel te mach'atic amen yo'tanique; yan te mach'atic lec yo'tanique, junuc me yo'tanic awu'un.

¹⁰ Te jmajq'uile, ja' te Dios te Toyol aye, ja' ya scoltay te mach'atic lec yo'tanique.

¹¹ Toj yat'el ta chajbanwanej stuquel te Diose; spisil ora ilinem yu'un te mach'atic amen yat'elique.

¹² Teme ay mach'a ma sujt'es yo'tan ta stojol Dios, ya sjuxbey ye te spuñale, snitojix te st'ime,

¹³ yaquix ta stojlinel ta st'im te ay sc'aale, chapalix te at'ejibaletic yu'une te ya yac' lajele.

¹⁴ Ilawilic te mach'a amen yo'tane: nojel ta yo'tan bitic amen, ya me yac' ayinuc jichuc alal te lote.

¹⁵ Ay spasojix pozo te mero najt' coele, ja' nix me ya xch'ay coel tey a.

¹⁶ Te smule soc te slab yo'tane ya me sujt' ta swenta.

¹⁷ Ya me calbey yutsil sc'oplal te Cajwale, melel toj yo'tan stuquel. Ya me jc'ajintaybey sbiil te Cajwale, ja' te Mach'a mero Toyole.