Salmos 69 - Bible in Tzeltal de Oxchuc y Tenejapa

Aw swenta woclajel

¹ Coltayawon, Dios cu'un, yu'un nopol ya jic'anix ja' c'oem;

² yacon ta biq'uel yu'un loob ajch'aleltic ya caiy, ma xwejt' ta banti ya cac'bey yich' yip te cacane. Jtaojbeyix c'oel te mero sc'ubulil ja'e, soc yaquix yeanbelon bael te yacan ja'e.

³ Majq'uemix jnuc' yu'un te bayal awunonixe; c'uxix jnuc' yu'un te awe. Lubix jsit ta smaliyel te Dios cu'une.

⁴ Tsobolic te mach'atic ay slab yo'tanic cu'un te tojol naxe, c'ax jich yajtalul a te bit'il stsotsil jole; mero esmajix te jcontrotac, ja'ic te tojol nax ya sc'an ya slajinonique. Ya yac'bonic jsujt'es te bila quelc'anej ta sc'opique, pero ma'yuc bila quelc'anej.

⁵ Dios cu'un, ja'at ana'ojbon te bitic ma jna' stsajtayele; ma xju' cu'un snaq'uel ta atojol te muliletic cu'une.

⁶ Cajwal, Diosat te Spisil ya xju' awu'une, te manchuc ya xtaotic q'uexlal ta scaj jmul te mach'atic ja'at smuc'ulinejat yo'tanique. Dios yu'un Israel, manchuc ya staic lo'layel ta swenta te bitic ya jpase te mach'atic c'ax bayal yutsil yo'tanic ya sleate.

⁷ Ja'at ta awenta c'axem cu'un uts'inel; la smacbon quelaw te q'uexlale.

⁸ Jchajp quilel ya yilonic, ma sna'boniquix jba te mero quermanotaque.

⁹ Ya xlajon ya caiy yu'un te bayal sc'oplal ta co'tan te anae; jo'on yac ta c'oel ta jtojol te bolc'optayel ta awenta yu'un te mach'atic ya yutate.

¹⁰ Te c'alal ya x'oc'on soc te ya jcom jwe'el, ya slabanonic yu'un;

¹¹ teme ya jlap jc'u' swenta seña mel-o'tan, spisilic ya stse'luyonic yu'un.

¹² Talel c'axel ya ya'anonic; te jyacubeletique ya sc'ajintayonic.

¹³ Pero te jo'on ya jc'oponat Cajwal. Dios cu'un, coltayawon yo'tic; ta swenta smuc'ul te xc'uxul awo'tan, jac'bon me te jc'ope. Ta swenta te bit'il spisil ora ay colel awu'un, aiybon me te jc'ope.

¹⁴ Ma me xawac' te ya yac'on ta biq'uel ta ach'al c'oeme. Coltayawon ta sc'ab te mach'atic ay slab yo'tanic cu'un; coltayawon a te manchuc ya smulon te sc'ubulil ja'.

¹⁵ Ma me xawac' stenon bael te yacan ja'e; ma me xawac' sbic'on coel te sc'ubulil yacan ja' te sutet naxe, te patil ya xcha'mac xan sbae.

¹⁶ Cajwal, jac'bon te jc'ope; ja'at mero lec awo'tan soc mero spisil xc'uxul awo'tan ya ac'uxtayon. Ta swenta te jich yipal c'uxon ta awo'tan, ac'a tel asit ta jtojol,

¹⁷ ma me xach'ayon te abaton awu'une. Jac'bon ta ora te jc'ope, nopol ya staon ya caiy te lajele.

¹⁸ Noptsajan ta jts'eel, coltayawon; coltayawon ta sc'ab te jcontrotaque.

¹⁹ Ja'at ana'oj te bila la yuts'inbonic co'tan, te la yac'on ta q'uexlal soc la sboltesbon jc'oplal, te c'axem jwocol yu'une; ja'at ana'oj te mach'atic scontroinejonique.

²⁰ Te bit'il la yuts'inbonic co'tan, la yejch'entesbonic ya caiy te co'tane. Ma'yuc yutsil q'uinal ya caiy soc ma'yuc quip. Tojol la cac' jwocol ta sleel mach'a ya smuc'tesbon q'uinal caiy, soc mach'a ya sna'bon yo'bolil jba.

²¹ La yac'bonic veneno ta jwe'el; soc te c'alal taquej co'tan, la yac'bonic cuch' vinagre.

²² Te smesaic soc swe'elic ta swenta xc'uxul sba ta yo'tanic, ac'a c'atp'ujuc ta spejts'ul stuquelic.

²³ Ac'a c'atp'ujuc ta ma'sitetic ta spisilic, soc staleluc yac ta nijq'uel yacanic ya xjilic.

²⁴ Ac'beya bael ta stojolic te awilimba; ac'a taotuc yu'un te sc'ajc'al awo'tan.

²⁵ Ac'a c'atp'ujuc ta jochol taquin q'uinal te campamento chapal yu'unic; te manchuc ayuc mach'a ya xnainic ta snailpaq'uic.

²⁶ Melel ya snutsic te mach'a la awac'beyix wocol ta stojol; soc ya stse'lubeyic xc'uxul te mach'a ejch'entesbil awu'une.

²⁷ Amen me xasujt'esbey te bila amen ya spasique; te manchuc ya staic perdón awu'un.

²⁸ Tup'beya sbiilic ta slibroil cuxlejal; ma me xawaq'uic ta slistaul te mach'atic toj yo'tanique.

²⁹ Pero te jo'one, Dios cu'un, te yacon ta chamel soc yacon ta mel-o'tan, jachawon soc coltayawon.

³⁰ Ya me c'ajintaybey yutsilal ta c'ayoj te Dios cu'une; ya me calbey yutsil ta yalbeyel wocol ta stojol.

³¹ C'ax jich yutsil yo'tan yu'un a te Cajwaltic, c'ax jich a te ja'uc ya cac'bey milbil smajt'an toro, o teme ya cac'bey jun novillo soc xulub soc slots' te jichuque.

³² C'alal jich ya xc'ot ta pasel, bin nax me yo'tanic yu'un te mach'atic ayic ta mel-o'tan; soc ya me xtal xan yip yo'tanic te mach'atic ya sleic te Diose.

³³ Melel te Cajwaltic ya yaiybey sc'opic te mach'a me'baetic; ma ba ya xch'ay te mach'atic yu'un te ayic ta chuquele.

³⁴ Ac'a yalbeyic yutsil sc'oplal Cajwaltic te ch'ulchan, balumilal soc mar, soc ta spisilic te bitic cuxajtic tey a.

^35-36 Melel Dios me ya scoltay te Sión, soc ya me xcha'pas te lumetic ta spamal sq'uinal Judá. Te yal-snich'nab te abatetic yu'un ya me yu'unin te lume; tey me ya xnainic a, ya me yich'beyic jilel; te mach'atic c'ux ta yo'tanic Dios ya me xnainic tey a.