Salmos 68 - Bible in Tzeltal de Oxchuc y Tenejapa

Marcha yu'un tsalaw Israel

¹ Te c'alal ya xjajch' ta at'el te Diose, te scontrotac ya xpujq'uic bael; te mach'atic ay slab yo'tanic yu'une, ya xloq'uic ta anel ta stojol.

² Jich ya xch'ayic bael te bit'il ch'ail ya xch'ay bael ta ic', ya x'ulubic jichuc chabec' ta c'ajc'; jc'axel ch'ayemic ta stojol Dios te mach'atic amen yo'tanique.

³ Pero te mach'atic leque bin nax me yo'tanic; bayal me yutsil yo'tanic ta stojol Dios, ya xwilic yu'un yutsil q'uinal yaiyic ta stojol Dios stuquelic.

⁴ C'ajintayaic te Diose, albeyaic sbiil ta c'ayojetic; albeyaic yutsil sc'oplal te mach'a cajal ta tocal te yac ta beele. ¡Binuc nax me awo'tanic yu'un te Cajwaltique! ¡Binuc nax me awo'tanic ta stojol!

⁵ Ja' te Dios ay ta ch'ul templo yu'une, ja' stat c'oem te me'ba alaletique, ja' ya xc'opoj yu'unic te me'ba antsetique.

⁶ Dios me ya x'ac'bot snaic yu'un ta banti ya xnainic te mach'atic pijt'esbilique, ya yac' ta libre te jchuqueletic, soc ya yac'bey jajch'el biluc yu'unic. Yan te mach'atic toybaetic ya me xnainic ta taquin lumq'uinal stuquelic.

⁷ Dios cu'un, te c'alal loc'at tel ta stojol te lum awu'une, te beenat bael ta jochol taquin q'uinale,

⁸ te lumq'uinal la syuq'uilay sba, te ja'al yal coel tel ta ch'ulchan, te wits Sinaí la syuq'uilay sba ta stojol Dios, ja' ta stojol te Dios yu'un Israel.

⁹ Dios cu'un, ja'at la awac' tel bayal ja'al, swenta yu'un la awac' xan lecubuc jajch'el te taquin lumq'uinal awu'une.

¹⁰ Te lum awu'un tey jc'axel nain a; pero ja'at, Dios cu'un, ta swenta xc'uxul ta awo'tan la awac'bey bitic mero ya xtuun yu'un te mach'a me'ba.

¹¹ C'opoj te Cajwaltique, tsobol antsetic la spucbeyic ta alel te sc'ope:

¹² “Yacalic ta anel te muc' ajwaliletic soc nix uuc te soldadoetic yu'unique”, xiic ta yalel. Ta snaic la spucbey sbaic te antsetic te bitic la yich'ic pojbeyel te contro;

¹³ pero te ja'exe anac'oj abaic jilel. Xic' stsumut potsbil ta plata, te sc'uc'umale potsbil ta t'ujbil oro.

¹⁴ Te Mach'a Spisil ya xju' yu'une, te c'alal la yac' anuc te muc' ajwaliletic, sacub ta nieve te sba wits Salmón.

¹⁵ Mero toyol te witsetic yu'un Basán, soc mero toyol ay te sba te witsetique.

¹⁶ Ja'ex te mero toyol witsexe, ¿bi yu'un te ay sbic'tal awo'tanic yu'un te wits te banti la sc'an yo'tan ya xnain te Diose? Te Cajwaltic ya me xnain sbajt'el q'uinal tey a.

¹⁷ Te Diose ta millonetic ay ta ajtayel te carretaetic ay yu'un swenta guerra; ta wits Sinaí och tel a, jul ta templo yu'un.

¹⁸ Dios cu'un, moat bael, ta mero toyol la awic' bael ta chuquel te jchuqueletique; la awich'bey spatan te ants-winiquetique, soc te mach'atic stoyoj sbaic la yac' sbaic ta atojol, Cajwal.

¹⁹ Bayal me yutsil te Cajwaltic, te Dios cu'untic, ja' te jcoltaywanej cu'untique, te jujun c'aal ya yich'botic te quijc'atstique.

²⁰ Te Dios cu'untic ja' nax stuquel te ya xcoltaywan, ya xju' ya scoltayotic ta lajel.

²¹ Dios me ya stop'bey sjol te scontrotac, ja' sjolic te mach'atic yacalic ta sleel te smulique.

²² Te Cajwaltic jich yaloj: “Ya me cac' sujt'an loq'uel ta Basán te acontrotaque; ya me cac' sujt'an loq'uel ta c'ubul mar,

²³ swenta yu'un ya me amul awacan ta xch'ich'el, soc ya me yuch'ic te ts'i'etic awu'une”, xi'.

²⁴ Ja'at Dios, Diosat cu'un, Muc' Ajwalilat cu'un, ta ch'ul awilal awu'un ya xchicnaj ta ilel te mach'atic xchapoj sbaic ta beel yu'un awich'el ta muq'ue.

²⁵ Te jc'ayojetic ja' neel yacalic ta beel, ta olil yacalic ta beel te jch'iel ach'ixetic te yacalic ta stijel bael panderoetic, ta spatic yacalic ta talel te jmúsicoetique.

²⁶ ¡Ta apisilic albeyaic yutsil sc'oplal te Cajwaltic Diose! ¡Ac'a yalbey yutsil sc'oplal spisil Israel te stsoboj sbaique!

²⁷ Ta stojolic ja' neel ay yu'unic te Benjamín, ja' te ijts'inal, soc bayal yantic jwentainwanejetic ta Judá, ta Zabulón, soc ta Neftalí.

²⁸ Dios cu'un, ac'a ta ilel awu'el; ac'a ta na'el xan te bila apasoj ta jtojoltique.

²⁹ C'alal to ta toyol templo awu'un ta Jerusalén, ta banti ya yich'bat tel amajt'an te muc' ajwaliletic,

³⁰ coma te Egipto, te chambalam c'oem te ayic ta tujt'iltic. Coma te nacionetic te ja' toroetic c'oem te buen c'ajq'uic, soc bic'tal toroetic. Ta swenta sbic'tal yo'tanic yu'un c'ulejalil ya yac' pejc'ajuquic ta stojolic te lumetique. Puca bael te ants-winiquetic te ya smulanic guerra.

³¹ Ta Egipto ya xtal abatetic yu'un ajwalil; te etiope-winiquetic ya me stoy sc'abic ta stojol Dios.

³² C'ajintayaic me Dios, jpasawetic ta mandal, soc spisil te alumalic te ay ta sejpelsejp ta balumilal; c'ajintayaic c'ayojetic ta stojol te Cajwaltic,

³³ ja' te moem ta caballo yac ta beel ta ch'ulchan, ja' te ch'ulchan sbajt'el q'uinal aye. Aiybeya awaiyic bi yaiyel yip sc'op, ja' te sc'op bayal yu'ele.

³⁴ Na'aic xan me ta lec te yu'el te Diose: te yip yu'el ta pasaw ta mandal, ya sjam bael sba ta stojol Israel, te yu'el ya sta c'oel syaxal te ch'ulchane.

³⁵ Jchajp a te yutsilal Dios ta ch'ul templo yu'une; te Dios yu'un Israel ya yac'bey yu'el soc yip te lum yu'une. ¡Wocol yalbotic te Diose!