Salmos 67 - Bible in Tzeltal de Oxchuc y Tenejapa

Ac'a yalbat yutsil ac'oplal spisil lumetic

¹ Dios cu'un, na'a yo'bolil jbatic soc ac'botic abendición; ilawotic soc xc'uxul awo'tan,

² swenta yu'un spisil nacionetic ta balumilal ya me sna'ic te sc'anjel awo'tane soc te colel awu'une.

³ Dios cu'un, ac'a yalbat yutsil ac'oplal te lumetique; ac'a yalbat yutsil ac'oplal ta spisilic.

⁴ Ac'a awunuc ta swenta yutsil q'uinal yaiyic te nacionetique; melel ja'at awentainej ta mero stojil te lumetique; ja'at ya atojtes te nacionetic ta spamal balumilal.

⁵ Dios cu'un, ac'a yalbat yutsil ac'oplal te lumetique; ac'a yalbat yutsil ac'oplal ta spisilic.

⁶ La yac' sit te bitic la yich' ts'unel ta lumq'uinale; te Dios cu'untique la yac'botic bendición.

⁷ Ac'a yac'botic bendición te Diose. Ac'a ich'otuc ta muc' yu'un te ants-winiquetic ta spamal balumilal.