Salmos 65 - Bible in Tzeltal de Oxchuc y Tenejapa

Snujp' te ya yich' alel yutsil sc'oplale,

¹ Dios ta Sión, snujp' te ya yich' alel yutsil ac'oplale; jich nix ya sc'an a te ya xc'ot ta pasel te bila calojtic ta atojole,

² melel ya awaiy te jc'optique. Spisil mach'atic ayic ta balumilal ya xtalic ta atojol.

³ Te muliletic ya x'u'uninwan, pero ja'at ya apas perdón yu'un te mulile.

⁴ Bin nax me yutsil te ants-winic te ya atsa soc te ya awic' bael ta nainel ta ats'eel tey ta banti templo awu'une. Nojesa co'tantic a te bila bayal yutsil ta ana, ja' te ch'ul templo awu'une.

⁵ Dios cu'untic soc jcoltaywanej cu'untic, ja'at ya ajac' jc'optic ta buen t'ujbil at'eliletic te mero stojil aye. Ta spamal lumq'uinal ja'at smuc'ulinejat yo'tan, ja' nix jich te mar c'ubul ay;

⁶ ja'at awac'ojbey yipic te witstiquile, soc awu'el soc awip yich'oj yipic.

⁷ Ja'at ya acom te c'alal ya xjajch' niletel yip te ja'e, soc te c'alal ya xjajch' ch'inlajanel yajwal te lumetique.

⁸ Te mach'atic nainemic ta c'ubul q'uinal ya xnijq'uic ta stojol te jchajp at'eliletic awu'une; ta awenta atuquel ay aw swenta yutsil q'uinal ta stojol sloq'uib c'aal soc ta smalib c'aal.

⁹ Ja'at ya acanantay te lumq'uinale, ya awac' tel ja'al ta stojol, soc ya awac' sitinuc awalts'unubil tey a. Ja'at ya awac' muc'ubuc te trigoetic ta swenta beja'etic te nojel ya'lelique. Jich ya achajban te lumq'uinale.

¹⁰ Ja'at ya awajts'es ta cholochol te lumq'uinale, ya anojes ta ja' te beja'etic yu'unique; ya awac' c'unajuc yu'un bayal ja'al soc ya awac'bey bendición te bi ya yich' c'ajel loq'uel tey a.

¹¹ Ja'at ya awac'bey bendición te ja'wile; te tocaletic awu'une ya yac' yaluc coel tel ja'al te c'ax bayale.

¹² Te yacul te jochol taquin q'uinale yaxubeniquix; te witstiquil ya yich' buen lec sc'u'ic.

¹³ Te spamlejal ya xnojic ta chijetic soc tentsunetic; te stenlej xatal q'uinal ya me sc'u'inic trigo. Spisilic ya xc'ajinic soc ya x'awunic ta swenta yutsil q'uinal yaiyic.