Salmos 61 - Bible in Tzeltal de Oxchuc y TenejapaJa' smuc'ul co'tan te canantayel yu'un Dios 1 Dios cu'un, aiybon awaiy caw yu'un xc'uxul te jwocole; ich'bon ta wenta jc'op te ya jc'oponate. 2 C'alal to ta mero xujc' lumq'uinal ya jc'oponat, melel ya xpejc'ajix ya caiy te co'tane. Coltayawon, ac'awon ta toyol tontiquil, 3 melel ja'at te anjibalat cu'une. Jichat bit'il buen tulan toyol ts'ajc' te ya scoltayon ta sc'ab te jcontroe. 4 Ya jc'an ya xnainon ta ana spisil ora; canantaybilon awu'un ta ye'tal axic' c'oem. 5 Ja'at Dios cu'un, awaiyoj te bila caloj ta atojole, la awac'bonix te bila ya xc'ot ta jwenta soc te mach'atic yich'ojbat ta muc' te abiile. 6 Ac'beya najt' xcuxlejal te muc' ajwalile; ac'a cuxinuc bayal c'aal soc bayal ja'wil. 7 Ac'a mandalajuc spisil ora soc te abendicione. Canantaya soc te xc'uxul awo'tan, te bit'il jun awo'tan ta stojole. 8 Jich me ya calbat yutsil ac'oplal spisil ora; ya me cac' c'otuc ta pasel ta swenta jujun c'aal te bila caloj ta atojole. |
Biblia en Tzeltal de Oxchuc y Tenejapa © Sociedad Bíblica de México, A.C., 2001.
Bible Society of Mexico