Salmos 60 - Bible in Tzeltal de Oxchuc y Tenejapa

Sc'anel coltayel yu'un Dios

¹ Dios cu'untic, ilin awo'tan ta jtojoltic; la ach'ayotic jilel, la awac' jinucotic jilel. Ac'botic sujt'el tel yo'tic te quiptique.

² La awac' nijc'uc te lumq'uinal soc la awac' te ya sjam sbae. Ac'beyaix smac sba yo'tic te banti la sjam sba, yu'un ya me xjajch'ix ta wuyel coel.

³ La awaq'uix c'axuc yu'un tulan pruebaetic te lum awu'une, la awac'botiquix vino c'oem te ya xjowejotic yu'une.

⁴ Ac'a ta ilel seña ta jtojoltic te jo'otic te quich'ojat ta muq'ue, swenta yu'un ma xlajotic ta yat'ejibal te t'imalte'e.

⁵ Jac'a jc'optic, coltayawotic ta awu'el; ac'a ta libre te mach'atic c'uxic ta awo'tane.

⁶ Te Dios c'opoj tel c'alal ta ch'ul templo yu'un: “Bin nax me co'tan ya jpuc te Siquem, soc ya me jpuc te stenlej xatal q'uinal yu'un Sucot.

⁷ Te Galaad soc Manasés ayic ta jwenta; te Efraín ja' smajq'uil c'oem ta jole; te Judá ja' jbastón c'oem yu'un pasaw ta mandal;

⁸ te Moab ja' vasija swenta spojquil c'abal cu'un; ta stojol Edom ya me jch'oj bael te jxanab; ya me x'awunon swenta bit'il la caiy tsalaw ta stojol te filisteoetique”, xi' te Diose.

⁹ ¿Mach'a ya yic'otic bael ta lum te ay sjoyob ts'ajc'ule? ¿Mach'a ya yic'otic bael c'alal Edom?

¹⁰ Melel ja'at Dios cu'untic la ach'ayotiquix; ma ba ya xloc'atix ta guerra soc te soldadoetic cu'untique.

¹¹ Coltayawotic ta sc'abic te jcontrotic, melel ma'yuc bi ya xtuun a te coltayel yu'un te winiquetique.

¹² Ta swenta coltayel yu'un Dios ay bitic tulanic sc'oplal ya xju' cu'untic spasel; ja' me ya spech'botic ta teq'uel stuquel te jcontrotique.