Salmos 6 - Bible in Tzeltal de Oxchuc y Tenejapa

Sc'oponel Dios c'alal ay mel-o'tan

¹ Cajwal, ma me socuc awilimba ya acomon, ma me xawac'bon castigo soc awilimba.

² Cajwal, na'bon me yo'bolil jba, yu'un ya caiy ta co'tan te ma'yuquix te quipe. Cajwal, ac'bon xan yip te jbaq'uetale, yu'un scojt'ol yac ta nijq'uel.

³ Yacon ta nijq'uel yu'un xiwel. Yan te ja'at Cajwal, ¿bi ora ya xtalat?

⁴ La', Cajwal, coltaybon te jcuxlejale, ta swenta te xc'uxul awo'tane, coltayawon.

⁵ Ma'yuc jtuluc te mach'a lajemix a te ya to sna'at xane; ¿Ay bal mach'a ya xju' yalbat xan yutsil ac'oplal ta muquenal?

⁶ Lubenonix yu'un te oq'uele. Jujun ajc'ubal bayal yacon ta oq'uel, te jts'anjole ts'ajalix ta ya'lel jsit.

⁷ Te xc'uxul jwocole ya xmajq'uix jsit yu'un; ya xmajc' jsit yu'un ta scaj smul te jcontroe.

⁸ ¡Q'ueja abaic ta jtojol, ja'ex te amen awat'elique! Te Cajwal la yaiybonix te coq'uele.

⁹ Te Cajwal la yaiyix stojol te la calbey wocole, te Cajwal la stsacbonix jc'op te la jc'opone.

¹⁰ Te jcontrotac lajelix ya yaiyic yu'un xiwel, ma stij sbaiquix ta jyalel yu'un; jmuts' nax sitil ya x'anic bael yu'un q'uexlal.