Salmos 59 - Bible in Tzeltal de Oxchuc y Tenejapa

Ja' scanantayejotic te Cajwaltique

¹ Dios cu'un, coltayawon ta sc'ab te jcontrotaque; coltayawon ta sc'abic te mach'atic ya sjach sbaic ta jtojole.

² Coltayawon ta sc'abic te mach'atic amen yo'tanique; coltayawon ta sc'abic te jmilawetique.

³ Melel ay winiquetic bayal yipic te ya smaliyic te bi ora ya xju' ya smilonique.

⁴ Cajwal, ma'yuc jtoyoj jba, ma ba jleoj jmul, ni ayuc bila amen jpasoj, pero yac'ojic puersa ta stenbelonic. Jajch'an, cuxa awo'tan, la' taawon bael, la', ila awil, Cajwal.

⁵ Jajch'an Cajwal, Diosat te Spisil ya xju' awu'une, Diosat yu'un te Israele. Ac'beya castigo te mach'atic ma ba xch'uunejat; ma me xac'uxtay te mach'atic amen yo'tanic te ya x'ac'awanic ta c'abale.

⁶ Ta ajc'ubal ya sujt'ic tel, jich sc'opic te bit'il ya xti'awan ts'i'etic, ya xtal sjointayic spamal te lume.

⁷ Yacal ta loq'uel sbul yeic a, jich ya yalic ta ixta c'op: “Ma'yuc mach'a ya yaiyotic stojol”, xiic.

⁸ Pero ja'at Cajwal, ya me atse'luy; ja'at me ya alaban te mach'atic ma ba xch'uunejate.

⁹ Ja'at Dios cu'un, ya acanantayon atuquel; melel ya me jnac' jba ta atojol, soc ya me xc'opojat cu'un.

¹⁰ Te Dios te c'uxon ta yo'tane, ya me xtal staon bael; ya me yac'bon quil te ya jtsal te jcontrotaque.

¹¹ Ma me jc'axeluc xamil, jich ma xch'ayic ta yo'tan a te jlumale; puca bael ta swenta te awu'ele, soc ac'a yich'ic pejc'anel awu'un. Te Cajwal ja' me jcanantaywanej cu'un stuquel.

¹² Ta spisil te bila ya yalique, tey ya sta smulic a; ja' nix ac'a chucotuc yu'un te stoybailique, soc ja' nix ac'a chucotuc yu'un te bila jc'axel xchapojic ta lote.

¹³ ¡Lajina, lajina ta swenta awilimba! ¡Ac'a ch'ayuc ta q'uinal! Ac'a sna'ic te ja' muc' ajwalil stuquel te Diose, ja' muc' ajwalil yu'un Jacob soc c'alal ta sti'il balumilal.

^14-15 Te bi ora ya sujt'ic tel ta ajc'ubal jich ya xtalic wojlajanel te bit'il ts'i'etique; ya spuc sbaic ta sjointayel ta spamal lum, yu'un ya sle swe'elic, ya me xjajch'ic awetel ta scaj te ma ba bayal la staique.

¹⁶ Yan te jo'one ya me jc'ajintayat ta sacubel q'uinal; ya me jchicnantes ta aw ta tulan te xc'uxul awo'tan soc nix te awu'ele. Melel ja'at te jcanantaywanejat cu'un, ja'at anjibalat cu'un te c'alal ayon ta wocole.

¹⁷ Dios cu'un, ya me jc'ajintay c'ayojetic, melel ja'at te anjibalat, te jcanantaywanejat cu'une; ja'at te Diosat cu'un te c'uxon ta awo'tane.