Salmos 57 - Bible in Tzeltal de Oxchuc y Tenejapa

Sc'anel coltayel yu'un Dios

¹ Na'bon yo'bolil jba, Dios cu'un, na'bon yo'bolil jba, melel ta atojol ya me jle canantayel. Ya jc'an ya jnac' jba ta ye'tal axic' c'oem, ja' to teme c'axix bael a te woclajele.

² Ya me jc'opon ta tulan te Dios te mero Toyole, ja' te Dios ya scoltayon ta spisile.

³ Ja' stuquel c'alal ta ch'ulchan ya me sticun tel te xc'uxul yo'tane, soc ya me sticun tel te bila smelelile; jich me ya scoltayon ta sc'abic te mach'atic soc sc'ajc'al yo'tanic ya stenonique.

⁴ Pacalonix ta lum ya caiy, ayonix ta yolil león-chojetic ya caiy, ja' te león-chojetic ya sti'ic ants-winiquetique; te sbaquel yeique pajal soc lanzaetic, pajal soc yat'ejibal t'imalte'etic, te yeique pajal soc ye puñal.

⁵ Dios cu'un, ja'at ayat ta sba te ch'ulchane, te awutsilal nojel yu'un te lumq'uinale.

⁶ Te jcontrotac la spasbonic jpejts'ul, sayalonix yu'un ya caiy; la sjutic ch'en te banti ya xc'axon ta beele, pero ja'ic nix ch'ayic coel tey a.

⁷ Dios cu'un, chapalix te co'tane; chapalix yu'un ya jc'ajintayat ta c'ayoj.

⁸ Jajch'an, jch'ulel, cuxa awo'tan; jajch'an, cuxa awo'tan ja'ex arpa soc yantic músicaetic; ya me xjajch'on, ya me jcux co'tan, sacubix q'uinal, yach'ilix te c'aale.

⁹ Cajwal, ya calbat yutsil ac'oplal ta c'ayoj ta yolil lumetic soc nacionetic.

¹⁰ Melel te xc'uxul awo'tane, Cajwal, c'oem smuc'ul c'alal ta ch'ulchan; te bit'il jun awo'tan ta jtojol ma'yuc slajibal, c'oem c'alal ta syaxal ch'ulchan.

¹¹ Dios cu'un, ja'at ayat ta sba te ch'ulchane; te awutsilal nojel yu'un te lumq'uinale.