Salmos 53 - Bible in Tzeltal de Oxchuc y Tenejapa

Spisil ants-winiquetic jowejemic

¹ Te mach'atic ma sna'ic q'uinale, ya yal ta yo'tanic: “Ma'yuc Dios”, xiic. Spisilic jowejemic, ja' spasojic te bila amen ta pasele; ma'yuc jtuluc mach'a ya spas te bila lec ta pasele.

² C'alal ta ch'ulchan ya x'ilot yu'un Dios te ants-winiquetique, ja' ya sle yil teme ay mach'a ay sp'ijil yo'tan, teme ay mach'a ya sle te Diose.

³ Pero spisilic jowejemic ta be, spisilic pajal boloben yo'tanic. Ma'yuquix mach'a ya spas te bila leque, mero ma'yuc jtuluc.

⁴ Ma'yuc sp'ijil yo'tanic te mach'atic amen yat'elique, ja'ic te ya swe'bonic te lum cu'une; jich ya slajinbonic te bit'il mach'a ya swe' waj, ja'ic te ma xyalbeyic wocol te Diose.

⁵ Manchuc me ma'yuc bila chican ta xi'el tey a te ya yac' nijq'uele, pero jajch'ic ta nijq'uel yu'un xiwel; melel Dios la spucbey sbaquel te controetique. Jilic ta q'uexlal melel ch'ayotic jilel yu'un te Diose.

⁶ Ja'uc ta wits Sión ya xtal scolel te lum Israel. Te bi ora ya stam jajch'el te lum yu'un te Cajwaltique, bin nax me yo'tanic ya xc'otic yu'un te sts'umbal Jacob, ja' ta spisil te lum Israele.